გოგა ბითაძის „ორლანდო მეჯიქმა“ NBA-ს რეგულარულ სეზონში ზედიზედ მეორე გამარჯვება მოიპოვა — ფლორიდელებმა გასვლით მატჩში „იუტა ჯაზი“ ანგარიშით 123:108 დაამარცხეს. ამ მოგებით „ორლანდომ“ 4-მატჩიანი გასვლითი სერია თანაბარი ბალანსით (2 მოგება, 2 წაგება) დაასრულა და სატურნირო მდგომარეობის გამოსწორების გზაზე დადგა — გუნდს ახლა 4 მოგება და 7 მარცხი აქვს, რის გამოც მომდევნო შეხვედრებში ქულების დაგროვება კრიტიკულად სჭირდება.
ქართველი ცენტრი თამაშში სათადარიგოთა სკამიდან ჩაერთო და პარკეტზე 20 წუთი გაატარა. მიუხედავად იმისა, რომ შეტევაში მცირე დატვირთვა ჰქონდა, ბითაძემ დაცვასა და ფარქვეშ ბრძოლაში სოლიდური სამუშაო გასწია: პარკეტზე გატარებულ 20 წუთში გუნდისთვის სასარგებლოდ ითამაშა: მან შეტევაში 4 ქულა ჩააგდო (მოროხა 2-დან 1 ორქულიანი და 4-დან 2 საჯარიმო), ხოლო დაცვით კომპონენტებში შესანიშნავი იყო — მოაგროვა 7 მოხსნა (მათ შორის 1 შეტევაში), მიითვალა 2 დაფარება და 1 ჩაჭრა. აღსანიშნავია, რომ ქართველი ცენტრის მოედანზე ყოფნისას „ორლანდომ“ მეტოქეს 13 ქულით აჯობა (+13), ბითაძემ კი თამაში უნაკლოდ, დაკარგვების გარეშე (0 დაკარგვა, 2 ჯარიმა) დაასრულა.
მთლიანობაში „მეჯიქმა“ მეტოქეს სამწამიან ზონაში აშკარად აჯობა (40:28 ქულა ფარქვეშ) და სწრაფ შეტევებშიც დომინირებდა (14:3). მატჩის ბედი მეოთხე პერიოდში გადაწყდა, როცა ბრაის სენსაბოს სამქულიანით „იუტა“ 96:95 დაწინაურდა, თუმცა „ორლანდომ“ ამას 18:3 გაქცევით უპასუხა და შეხვედრა გამარჯვებამდე მშვიდად მიიყვანა.
გამარჯვებულთა რიგებში 38 ქულითა (პირადი რეკორდის გამეორება) და 8 მოხსნით ფრანც ვაგნერი გამოირჩა. 25 ქულა ჩააგდო დესმონდ ბეინმა (11-დან 7 სამქულიანი), ხოლო ენტონი ბლექმა 22 ქულა და 8 შედეგიანი გადაცემა მიითვალა. მასპინძელთაგან საუკეთესო დარინ პეტერსონი იყო 22 ქულით, ხოლო „იუტასთვის“ ეს ზედიზედ მე-10 მარცხი აღმოჩნდა (1-11 ბალანსი).
გასვლითი ტურნეს დასრულების შემდეგ „ორლანდო მეჯიქი“ შინ ბრუნდება და მომდევნო შეხვედრას პარასკევს, 13 ნოემბერს (თბილისის დროით 14 ნოემბერს, გამთენიისას) საკუთარ არენაზე „მილუოკი ბაქსის“ წინააღმდეგ გამართავს.
