სანდრო მამუკელაშვილმა „ლოს ანჯელეს ლეიკერსის“ შემადგენლობაში თავისი საუკეთესო მატჩი ჩაატარა — ეს მოხდა ბოლო საგამოფენო შეხვედრაში, სადაც კალიფორნიელებმა „დენვერ ნაგეთსს“ უმასპინძლეს (106:121), მომდევნო შეხვედრა კი უკვე ოფიციალური, ნბა-ს რეგულარული ჩემპიონატის სადებიუტო მატჩი იქნება, რომელსაც 21 ოქტომბერს „გოლდენ სტეიტ უორიორსი“ უმასპინძლებს.
მართალია, ქულების მხრივ სანდროს ყველაზე შედეგიანი თამაში „საკრამენტო კინგსთან“ ჰქონდა (სადაც 9 ქულა მიითვალა) და „გოლდენ სტეიტთანაც“ 15 ქულით გამოირჩა, თუმცა საერთო სარგებლიანობითა და მარგი ქმედების კოეფიციენტით ეს შეხვედრა მისთვის უდავოდ საუკეთესო აღმოჩნდა. ქართველი ფორვარდი ნბა-ს ოფიციალურმა პლატფორმამ მატჩის ერთ-ერთ საუკეთესო მოთამაშედ აღიარა „დენვერის“ სუპერვარსკვლავ ნიკოლა იოკიჩთან ერთად.
პარკეტზე გატარებულ 21 წუთში სანდრომ „ლეიკერსის“ რიგებში ყველაზე მეტი მოხსნა (8) და ყველაზე მეტი შედეგიანი გადაცემა (4) მიითვალა (პასებით მხოლოდ უოკერ კესლერს გაუტოლდა). მამუკელაშვილმა 15 ქულა დააგროვა, საიდანაც 10-დან 5 თამაშიდან ჩააგდო (3-დან 2 ორქულიანი, 7-დან 3 სამქულიანი) და 2-ვე საჯარიმო ზუსტად გამოიყენა (100%). განსაკუთრებით აღსანიშნავია, რომ ასეთი ინტენსიური თამაშის ფონზე ქართველ კალათბურთელს არცერთი დაკარგვა არ ჰქონია, დაცვაში კი 1 ჩაჭრა და 1 დაფარებაც ჩაწერა აქტივში, რის შედეგადაც მისი მოედანზე ყოფნისას გუნდის +/- მაჩვენებელი დადებითი (+6) იყო — საუკეთესო შედეგი „ლეიკერსის“ შემადგენლობაში.
მატჩში „ლეიკერსიდან“ ქულებით მხოლოდ ოსტინ რივერსმა გაასწრო სანდროს (19 ქულა), ხოლო გუნდის სხვა ლიდერებიდან ზიაირ უილიამსმა 14 ქულა, ლუკა დონჩიჩმა 15 ქულა, ჯადენ ჰარდიმ 13, ხოლო კუენტინ გრაიმსმა 11 ქულა მოაგროვეს. „დენვერ ნაგეთსის“ შემადგენლობაში კი ჯამალ მურიმ (21 ქულა), ნიკოლა იოკიჩმა (17 ქულა, 6 მოხსნა, 8 პასი), კრისტიან ბრაუნმა (16 ქულა) და დემარ დეროზანმა (14 ქულა) გამოიჩინეს თავი.
წინასასეზონო მატჩების ასეთი შთამბეჭდავი ფინალის შემდეგ, სანდრო მამუკელაშვილი სრულ მზადყოფნაში ხვდება ნბა-ს ოფიციალურ სეზონს, რომელიც სტარტს 21 ოქტომბერს აიღებს.
