თურქულ სპორტულ მედიაში გავრცელებული უახლესი ინფორმაციის თანახმად, სტამბოლის „გალათასარაის“ საკალათბურთო კლუბის მთავარი მწვრთნელის პოსტზე მანუჩარ მარკოიშვილის დანიშვნა ფაქტობრივად გადაწყვეტილია. როგორც თურქული გამოცემები იუწყებიან, კლუბის ხელმძღვანელობამ თავის ყოფილ მოთამაშესთან კონტრაქტის ყველა ძირითადი დეტალი უკვე შეათანხმა და მის სტამბოლში გამოჩენას უახლოეს პერიოდში ელიან.
მედიაში გავრცელებული ცნობების მიხედვით, სტამბოლური კლუბის პირველადი არჩევანი გერმანული „ვურცბურგის“ სლოვენიელი დამრიგებელი საშო ფილიპოვსკი გახლდათ. თუმცა, მოლაპარაკებების პროცესი მას შემდეგ შეიცვალა, რაც სლოვენიელმა სპეციალისტმა გერმანულ მხარესთან არსებული გამოსასყიდი თანხის დაფარვა უშუალოდ „გალათასარაისგან“ მოითხოვა. ამ ბარიერის წარმოქმნის შემდეგ, თურქულმა გრანდმა ყურადღება სრულად მარკოიშვილზე გადაიტანა.
გამოცემები ასევე ხაზგასმით აღნიშნავენ, რომ მარკოიშვილი სტამბოლში მარტო არ მიდის. მასთან ერთად სამწვრთნელო შტაბში იმუშავებს უკრაინელი სპეციალისტი სერგეი გლადირიც, რომელთან ერთადაც ქართველი მწვრთნელი ფრანგულ „მონაკოში“ წარმატებით საქმიანობდა. „სატახტო კლუბში“ გატარებული წარმატებული პერიოდის მიუხედავად, სადაც გუნდმა საფრანგეთის ჩემპიონატის ტიტული მოიპოვა, „მონაკო“ შექმნილი ფინანსური პრობლემების გამო გაკოტრების რეჟიმში იმყოფება, რამაც სამწვრთნელო დუეტს კარიერის გაგრძელების ახალი ასპარეზი გაუხსნა.
აღსანიშნავია, რომ მანუჩარ მარკოიშვილი ამჟამად საქართველოს ეროვნული ნაკრების მთავარი მწვრთნელის, ალექსანდარ ჯიკიჩის ასისტენტიც გახლავთ. რაც შეეხება თავად „გალათასარაის“, სტამბოლური კლუბი ევროპული კალათბურთის ერთ-ერთი გამორჩეული და მდიდარი ტრადიციების მქონე ორგანიზაციაა — გუნდი შიდა ასპარეზზე ევროპის ერთ-ერთ უძლიერეს, თურქეთის სუპერლიგაში (BSL) ასპარეზობს, სადაც ისტორიულად 18-ჯერ აქვს ჩემპიონის ტიტული მოპოვებული, საერთაშორისო სარბიელზე კი, სადაც ამჟამად ფიბას ჩემპიონთა ლიგაში გამოდის, უდიდეს მიღწევად 2015-2016 წლების სეზონში ევროპის თასის (EuroCup) დასაკუთრება ითვლება.
