ესპანეთის ლიგა ენდესას 32-ე ტურის შეხვედრამ გიორგი შერმადინისა და თორნიკე შენგელიას გუნდების დაპირისპირება მოიტანა, სადაც „ტენერიფე“ საკუთარ მოედანზე, სანტიაგო მარტინის სახელობის დარბაზში „ბარსელონასთან“ 97:102 დამარცხდა. კანარული კლუბი აშკარა კრიზისულ პერიოდს გადის, რადგან ეს უკვე მათი ზედიზედ მეოთხე წარუმატებლობაა, რამაც პლეი-ოფში ადგილის დამკვიდრების საკითხი კითხვის ნიშნის ქვეშ დასვა. საქართველოს ნაკრების კაპიტანმა კატალონიელთა რიგებში 21 წუთი ითამაშა და აქტივში 13 ქულა, 2 მოხსნა, 2 პასი და 1 ჩაჭრა ჩაიწერა. თორნიკემ 6-დან 5 ორქულიანი და 2-დან 1 სამქულიანი გამოიყენა, საჯარიმო სროლები კი არ შეუსრულებია, რის შედეგადაც მისი მარგი ქმედების კოეფიციენტი 15-ს გაუტოლდა. მასპინძელთა ქართველ ცენტრს კი თამაში ნაკლებად წაუვიდა — 16 წუთში შერმადინმა მხოლოდ 2 ქულა და 2 მოხსნა მიითვალა. გიორგიმ 4-დან 1 ორქულიანი ჩააგდო და მისი სარგებლიანობის მაჩვენებელი მხოლოდ 1 გამოდგა. მასპინძელთა შემადგენლობიდან მარსელინო უერტასი (20 ქულა) და ბრუნო ფიტიპალდო (19 ქულა) საკმაოდ შედეგიანად გაისარჯნენ, თუმცა მათმა პროდუქტიულობამ გუნდი წაგებისგან მაინც ვერ იხსნა. ამ დროისთვის „ბარსელონა“ 23 მოგებითა და 9 მარცხით სატურნირო ცხრილის მესამე პოზიციაზე იმყოფება, მომდევნო მატჩს კი 29 მაისს, სტუმრად „მორაბანკ ანდორასთან“ ჩაატარებს. რაც შეეხება ზედიზედ მეოთხედ დამარცხებულ „ტენერიფეს“, ისინი 17 გამარჯვებითა და 14 მარცხით მეშვიდე ადგილს იკავებენ და მომავალ ტურში, 20 მაისს, „ხუვენტუტ ბადალონას“ კვლავ საკუთარ კედლებში უმასპინძლებენ.
