„სამტრედიას“ სენსაციური გამარჯვება „სამგურალთან“, „თელავმა“ ბოლო წუთზე მოიგო

„სამტრედიამ“ კრისტალბეთ ეროვნულ ლიგაში ზედიზედ მეოთხე მატჩი მოიგო, ჩრდილოეთ მაკედონიელი დიმიტარ კაპინკოვსკის გაწვრთნილმა გუნდმა ამჯერად სტუმრად წყალტუბოს „სამგურალი“ დაამარცხა, რომელიც აშკარა ფავორიტად მიიჩნეოდა.
სამტრედიელებიდან მე-4 წუთზე ანგარიში სერბმა ლეგიონერმა სტრაჰინია პავიშიჩმა გახსნა. 23-ეწუთზე „სამგურალის“ მცველმა ნიკა კალანდარიშვილმა ბურთი თავის კარში გაიტანა. 66-ე წუთზე ზვიად ნაჭყებიას პასის მერე მასპინძლების კარი ჩრდილოეთ მაკედონიელმა ალექსანდარ მიშოვმა აიღო და ეს გოლი შეხვედრაში ბოლო აღმოჩნდა.
„სამტრედიამ“ 25 ქულა დააგროვა და 10-გუნდიან ჩემპიონატში მე-8 ადგილზეა, ხოლო „სამგურალი“ 45 ქულით მე-5 პოზიციაზეა. კრისტალბეთ ეროვნული ლიგის განახლების მერე, წყალტუბოელები ძალიან არადამაჯერებლად თამაშობენ და გამორიცხული არაა გიორგი ჭელიძე მთავარი მწვრთნელის თანამდებობიდან დაოთხოვონ.
სამგურალი 0:3 სამტრედია 
„თელავმა“ გორის „დილა“ მიიღო და მსაჯის მიერ კომპენსირებულ დროში გაიმარჯვა. შეხვედრაში პირველი გოლი მე-5 წუთზე გავიდა, როდესაც გიორგი გაფრინდაშვილმა მარცხენა ფრთაზე ბურთიანად დაახლოებით 40 მეტრი ირბინა და საჯარიმოში შესულმა შორეულ ძელთან ჩააწოდა, სადაც მყოფმა სენეგალელმა ონორე გომისმა ერთი შეხებით ზუსტად დაარტყა – 0:1.
მასპინძლებიდან თავი ისევ საუცხოო სათამაშო ფორმაში მყომფა ირაკლი რუხაძემ გამოიჩინა, როდესაც სლოვენიელი მატია რომის პასი მიიღო და მას მერე რაც მეურვეს სისწრაფეში აჯობა, საჯარიმოში შესულმა ანგარიში გაათანაბრა – 1:1. 85-ე წუთზე თელაველთა კონტრშეტევის დროს „დილას“ დაცვა აშკარად ჩავარდა და საჯარიმოში მარჯვნიდან შესულმა თორნიკე მორჩილაძემ ბურთი კარის წინ მარტო მდგომა გურამ გოშთელიანს გადააწოდა, რომელმაც გუნდს 3 ქულა მოუტანა.
ირაკლი მოდებაძის გაწვრთნილი „დილა“ 44 ქულით მეოთხეა, ხოლო გიორგი მიქაძის გაწვრთნილი „თელავი“ 30 ქულით მეშვიდეა.
თელავი 2:1 დილა 
ლაშა თაბაგარი