პორტუგალიის გასული სეზონის საუკეთესო ფეხბურთელად ლისაბონის „ბენფიკას“ აწ უკვე ყოფილი ფორვარდი დარვინ ნუნიესი დაასახელეს.
„თუ ვინმეს ეჭვი ეპარება, მის სახელს ვაზუსტებთ: დარვინი! ის საუკეთესო ბომბარდირი, სეზონის სიმბოლურ ნაკრებში მოხვდა, ხოლო ახლა ჩემპიონატის MVP-ის ტიტული მიიღო. გვირგვინი მიართვით გეთაყვა!“ – ნათქვამია პორტუგალიის პრიმერა ლიგის ოფიციალურ განცხადებაში.
23 წლის ურუგვაელმა გასულ სეზონში პორტუგალიის ჩემპიონატში ჩატარებულ 28 მატჩში 26 გოლი გაიტანა და 4 საგოლე პასი გააკეთა.
გასული სეზონის დასრულების შემდეგ, „ბენფიკამ“ ნუნიესი 75 მილიონ ევროდ „ლივერპულში“ გაყიდა.
