ბათუმის „დინამომ“ კონფერენს ლიგა რიხიანად დაიწყო. გია გეგუჩაძის გაწვრთნილები სტუმრად სან-მარინოს „ტრე პენეს“ დაუპირისპირდნენ და სოლიდური სხვაობით დაამარცხეს.
მე-8 წუთზე, ბათუმელთა რამდენიმე სვლიანი კომბინაციის დროს, ბურთი მეტოქის საჯარიმოში მარცხნიდან გახსნილმა ჯაბა ჯიღაურმა მიიღო, რომლის გადაცემის მერე კარის წინ მყოფმა გიორგი ფანცულაიამ ერთი შეხებით ანგარიში გახსნა – 0:1.
მე-10 წუთზე, ლაზარე კუპატაძემ თამაშში შეიტანა ბურთი, რომელიც მეტოქის ნახევარზე გიორგი ფანცულაიამ მიიღო და პასი ჯიღაურს გაუკეთა, ამ უკანასკნელმა კი მასპინძლების საჯარიმოში დასარტყმელ პოზიციაზე ვლადიმერ მამუჩაშვილი გაიყვანა, რომელმაც შანსი გამოიყენა – 0:2.
მე-18 წუთზე, ტეიდმა ზუსტი პასით „ტრე პენეს“ საჯარიმოში მარცხნიდან გახსნილი ჯიღაური მოძებნა, რომელიც ერთ მცველს გასცდა და ზუსტად დაარტყა – 0:3.
58-ე წუთზე, გროცურეკის პასის შემდეგ სან-მარინოელთა საჯარიმოში მდგომმა გიორგი ზარიამ ერთი შეხებით ბურთი ზედა კუთხეში ზუსტად გაგზავნა -0:4.
დარჩენილ დროში ბათუმელებს მეტოქის კარის აღების შანსი კიდევ ჰქონდათ, მაგრამ მეტი გოლი არ გასულა.
„დინამო“ საპასუხო შეხვედრას „ტრე პენესთან“ 15 ივლის ბათუმის ახალ არენაზე ჩაატარებს.
„ტრე პენე“ (სან მარინო) – „დინამო“ (ბათუმი) 0:4 (0:3)
8 ივლისი. სან-მარინო. სტადიონი „სერავალე“.
„ტრე პენე“: მიპანი, გაი (კ), ბადალასი, ბოჩიოლეტი, ლომბარდი, მაიკონი (ჩეზარინი, 64), პალაცი, პიერი (კოსტა, 64), სანტონი, სარტორი, სემპრინი (ბატისტინი, 55).
მთავარი მწვრთნელი: სტეფანო ჩეჩი
„დინამო“ (ბთ.): კუპატაძე, კობახიძე (კ), ჩაბრაძე, აზაროვი, ალთუნაშვილი (შინდაგორიძე, 46), მარგველაშვილი, ჯიღაური (ზარია, 46), მამუჩაშვილი, ტეიდი (მანჯგალაძე, 62), ფანცულაია (გროცურეკი, 46), ფლამარიონი (სანოგო, 57).
მთავარი მწვრთნელი: გია გეგუჩაძე.
გოლი: 0:1 ფანცულაია (8), 0:2 მამუჩაშვილი (10), 0:3 ჯიღაური (18), 0:4 ზარია (58)
გაფრთხილება: აზაროვი (36)
მთავარი მსაჯი: რობერტას ვალიკანისი (ლიტვა)
