მოქმედმა ჩემპიონმა პორტუგალიის ეროვნულმა გუნდმა ევრო-2020 გამარჯვებით დაიწყო.
პორტუგალიელებმა ბუდაპეშტში ფერენც პუშკაშის სახელობის სტადიონზე 67000 მაყურებლის თვალწინ უნგრეთის ნაკრები 3:0 დაამარცხეს.
პორტუგალიელთა დიდი უპირატესობის მიუხედავად პირველი ტაიმი გატანილი გოლების გარეშე დასრულდა.
84-ე წუთზე, ანგარიში რაფაელ გერეირომ გახსნა. 87-ე წუთზე რაფა სილვას წაქცევისთვის დანიშნული პენალტი კრიშტიანუ რონალდუმ გაიტანა.
მსაჯის მიერ ძირითადი დროსთვის დამატებულ მე-2 წუთზე უნგრელთა მეკარესთან პირისპირ დარჩენილმა რონალდუმ გულაშის გვერდი აუარა და დუბლი შეასრულა.
რონალდუმ ევროპის ჩემპიონატების ფინალურ ეტაპებზე გატანილი გოლების რაოდენობით ლეგენდარულ ფრანგ მიშელ პლატინის გაასწრო.
დღემდე, ორივეს ანგარიშზე 9-9 გოლი იყო, ხოლო უნგრეთთან შეხვედრის მერე პორტუგალიელმა თავი 11 გოლს მოუყარა. თუმცა, ისიც სათქმელია, რომ მას ამ შედეგის მისაღწევად ევროპის 5 ჩემპიონატი დასჭირდა, ხოლო ფრანგმა 9 ბურთი თავის სამშობლოში 1984 წელს გამართულ ევროპირველობაზე შეაგდო.
რონალდუ ერთადერთი ფეხბურთელია, რომელმაც გოლები 5 სხვადასხვა ევროპის ჩემპიონატებზე გაიტანა.
რონალდუ 36 წლისა და 130 დღის ასაკში ყველაზე ასაკოვანი ფეხბურთელია, რომელმაც ევროპის ჩემპიონატზე დუბლი შეასრულა. მან უკრაინელი ანდრეი შევჩენკოს რეკორდი გააუმჯობესა, რომელმაც ევრო-2012-ზე შვედების კარი ორჯერ 35 წლისა და 256 დღის ასაკში აიღო.
სხვათა შორის, ევრო-2016-ზე პორტუგალია და უნგრეთი ერთ ჯგუფში იყვნენ – მაშინ მატჩი 3:3 დასრულდა, ხოლო რონალდუმ დღევანდელი თამაშის მსგავსად დუბლი მიითვალა.
რონალდუს ანგარიშზე სანაკრებო მატჩებში უკვე 106 გოლი და მას ირანელ ალი დაეს რეკორდამდე 3 ბურთი აშორებს.
