ერთა ლიგა 2020/21 – საქართველო განთესილთა შორის…

0
52

შვეიცარიის ქალაქ ნიონში უეფას აღმასრულებელი კომიტეტის სხდომა გაიმართა. ევროპული ფეხბურთის მმართველი ორგანიზაციის შტაბ-ბინაში გამართულ სხდომაზე, უეფას ფეხბურთის კომიტეტის თავმჯდომარის რანგში, საქართველოს ფეხბურთის ფედერაციის პრეზიდენტმა მიიღო მონაწილეობა. ლევან კობიაშვილმა შეკრებილებს უეფას ფეხბურთის კომიტეტის შემაჯამებელი ანგარიში გააცნო.
უეფას აღმასკომის სხდომაზე სხვადასხვა აქტუალური თემა განიხილეს, მათ შორის: 2022 წლის ფიფას მსოფლიო თასის ევროპის ზონის საკვალიფიკაციო ეტაპის ფორმატი და პლეი ოფი. 2020/21 უეფას ერთა ლიგის გათამაშების ფორმატი და აგრეთვე ფუტსალის, ქალთა ფეხბურთისა და სამსაჯო საკითხები.
უეფამ ერთა ლიგის 2020/21 სეზონის გათამაშების წილისყრისთვის თავის საიტზე კალათები გამოაქვეყნა.
საქართველოს ნაკრები C დივიზიონში პირველ კალათაშია და განთესილთა შორისაა.

A დივიზიონი
კალათა 1: პორტუგალია, ნიდერლანდები, ინგლისი, შვეიცარია
კალათა 2: ბელგია, საფრანგეთი, ესპანეთი, იტალია
კალათა 3: ბოსნია, უკრაინა, დანია, შვედეთი
კალათა 4: ხორვატია, პოლონეთი, გერმანია, ისლანდია
B დივიზიონი:
კალათა 1: რუსეთი, ავსტრია, უელსი, ჩეხეთი
კალათა 2: შოტლანდია, ნორვეგია, სერბეთი, ფინეთი
კალათა 3: სლოვაკეთი, თურქეთი, ირლანდია, ჩრდილოეთ ირლანდია
კალათა 4: ბულგარეთი, ისრაელი, უნგრეთი, რუმინეთი
C დივიზიონი
კალათა 1: საბერძნეთი, ალბანეთი, მონტენეგრო, საქართველო
კალათა 2: ჩრდილოეთ მაკედონია, კოსოვო, ბელარუსი, კვიპროსი
კალათა 3: ესტონეთი, სლოვენია, ლიეტუვა, ლუქსემბურგი
კალათა 4: სომხეთი, აზერბაიჯანი, ყაზახეთი, მოლდოვა

D დივიზიონი
კალათა 1: გიბრალტარი, ფარერები, ლატვია, ლიხტენშტაინი
კალათა 2: ანდორა, მალტა, სან-მარინო

ტურნირი ახალი ფორმატით ჩატარდება, ყველა ჯგუფი ოთხგუნდიანი იქნება, გარდა D დივიზიონის ერთი ჯგუფისა, რომელიც სამი ნაკრებით დაკომპლექტდება.

უეფას გადაწყვეტილებით, ქალთა ჩემპიონთა ლიგის ახალი სეზონი განსხვავებული ფორმატით ჩატარდება, რაც გულისხმობს გაზრდილ შანსს ქვეყნებისთვის და ახალი კლუბების მონაწილეობას ჯგუფური ეტაპის გათამაშებაზე.
უეფას აღმასრულებელი კომიტეტის მომდევნო სხდომა 2020 წლის 2 მარტს ამსტერდამში შედგება,  3 მარტს კი ჰოლანდიის დედაქალაქში უეფას რიგით 44-ე კონგრესი ჩატარდება და ერთა ლიგის კენჭისყრაც გაიმართება.