თომას ტუხელი ინგლისის ნაკრების მწვრთნელია

ინგლისის ფეხბურთელთა ეროვნული ნაკრების ახალი მთავარი მწვრთნელი თომას ტუხელია. 51 წლის გერმანელი სპეციალისტი მუშაობას 2025 წლის პირველი იანვრიდან შეუდგება, ინგლისური მედიის ინფორმაციით, მისი ხელფასი წელიწადში 4,5 – 5 მილიონი გირვანქა სტერლინგი იქნება. შვედი სვენ-გორან ერიქსონის და იტალიელი ფაბიო კაპელოს შემდეგ, ტუხელი მესამე უცხოელია, რომელიც ინგლისის ეროვნულ გუნდში იმუშავებს.
ტუხელი გასულ სეზონში მიუნხენის „ბაიერნს“ ავარჯიშებდა, რომელიც ზაფხულში დატოვა. მანამდე, ის „მაინცში“, დორტმუნდის „ბორუსიაში“, პსჟ-ში და „ჩელსიში“ მუშაობდა.
მან „ბორუსიას“ გერმანიის თასი მოაგებინა, ხოლო პსჟ-ს ორჯერ საფრანგეთის ლიგა 1-ში გაამარჯვებინა. ტუხელმა „ჩელსისთან“ ერთად ჩემპიონთა ლიგაში გაიმარჯვა და ევროპის სუპერთასი მოიპოვა.
ლაშა თაბაგარი