ქავთარაძის მორიგი დუბლი და ყაზახეთის პრემიერლიგის საგზური

ბექა ქავთარაძემ „ელიმაის“ შემადგენლობაში ყაზახეთის რანგით მეორე ლიგაში მორიგი დუბლი შეასრულა და გუნდს ვადაზე ადრე პრემიერლიგის საგზური გაუნაღდა.
„ელიმაიმ“ სტუმრად თამაზ მაქაცარიას და ლაშა კასრაძის „ჟენისი“ 3:0 დაამარცხა. მე-20 წუთზე ქართველმა ფორვარდმა მეტოქის საჯარიმოში შექმნილი არეულობით ისარგებლა და ანგარიში გახსნა. 34-ე წუთზე „ელიმაიმ“ საჯარიმო გაითამაშა და ქავთარაძემ ერთი შეხებით მეორე გოლი მიითვალა. მან მიმდინარე სეზონში 17 შეხვედრაში 16 გოლი გაიტანა და 7 საგოლე პასი გააკეთა. 47-ე წუთზე კასრაძემ პირდაპირ წითელი ბარათი მიიღო, ხოლო ცოტა ხანში მაქაცარია შეცვალეს.
„ელიმაიმ“ ყაზახეთის პრემიერლიგის საგზური ტურნირის დასრულებამდე რამდენიმე ტურით ადრე მოიპოვა, რაც ქავთარაძის დიდი დამსახურებაა.
ლაშა თაბაგარი