„ტორპედომ“ წარმატებული სვლა გააგრძელა, შალამბერიძის იღბლიანი დაბრუნება

კრისტალბეთ ეროვნული ლიგის განახლების შემდეგ ქუთაისის „ტორპედომ“ წაუგებელი მატჩების სერია შვიდამდე (6 გამარჯვება, ერთი ფრე) გაზარდა. კახა ჩხეტიანის გაწვრთნილი გუნდი სტუმრად ბოლნისის „სიონს“ შეხვდა და 3 უპასუხო ბურთი გაუტანა. პირველი ტაიმი უგოლოდ დასრულდა. 58-ე წუთზე ტორპედოელთა კონტრშეტევის დროს მასპინძლების საჯარიმოში მარჯვნიდან შეჭრილმა გიორგი არაბიძემ კარის გასწვრივ ჩააწოდა ბურთი, რომელიც ირაკლი ბუღრიძემ ზუსტად დაარტყა – 0:1.
ათ წუთში არაბიძემ და მაურო კაბალიერომ „სიონის“ საჯარიმოსთან საუცხოო კომბინაცია გაითამაშეს, რომელიც პარაგვაელმა მარცხენა ფეხით „ცხრიანში“ ეფექტური დარტყმით დაასრულა – 0:2.
77-ე წუთზე ანატოლი მესიაჩენკოსა და ლევან ახვლედიანს შორის შეხლა-შემოხლა ორივე ფეხბურთელის გაძევებით დასრულდა.
ძირითადი დროსთვის დამატებულ პირველ წუთზე ვაჟა ტაბატაძემ დაახლოებით 22 მეტრიდან დაარტყა და ლევან ისიანის უხეში შეცდომის მერე ბურთი კარში აღმოჩნდა – 0:3.
„ტორპედოს“ ზედიზედ სამი თამაშის მოგების მერე 40 ქულა აქვს და 10-გუნდიან სატურნირო ცხრილში მე-4 ადგილზე გადაინაცვლა, ხოლო უჩა სოსიაშვილის ხელმძღვანელობით „სიონმა“ 27 ქულა დააგროვა და მერვეა.
თემურ შალამბერიძის „საბურთალოში“ დაბრუნება იღბლიანი აღმოჩნდა. თბილისელებმა თანაქალაქელი „ლოკომოტივი“ რუსთავში ფეხბურთის ფედერაციის ტექნიკურ ცენტრში მიიღეს და 5:1 გაანადგურეს.
შეხვედრის მე-11 წუთზე ანგარიში სტუმრებიდან ბიძინა მახარობლიძემ გახსნა, ხოლო მე-14 წუთზე გურამ გოშთელიანის პასით საპასუხო ბურთი შოთა ნონიკაშვილმა გაიტანა. 21-ე წუთზე თავი უკვე გოშთელიანმა გამოიჩინა, რომელსაც ასისტენტობა საბა მამაცაშვილმა გაუწია. 43-ე წუთზე გოშთელიანმა მეორე შედეგიანი პასი მიითვალა – ამჯერად ლევან ნონიკაშვილმა გაიტანა. 54-ე წუთზე იმავე გოშთელიანის პასს იური ტაბატაძის გოლი მოჰყვა, 59-ე წუთზე კი, გოშთელიანმა დუბლი შეასრულა.
„საბურთალომ“ 5-მატჩიანი (4 წაგება და 1 ფრე) წარუმატებელი სერია შეწყვიტა და 34 ქულით მეექვსეა, ხოლო ნიდერლანდელი ჯონ ვან ლუნის დამოძღვრილი „ლოკომოტივი“ 5 ქულით ბოლოა.