ვილი სანიოლს მიაჩნია, რომ მარტში ჩატარებულ ამხანაგურ მატჩებთან შედარებით ნაკრებს დიდი პროგრესი აქვს. ჩვენი ეროვნული გუნდის ფრანგმა დამრიგებელმა ამის შესახებ „მიხეილ მესხზე“ რუმინეთთან 1:1 დასრულებული სპარინგის მერე განაცხადა.
ვილი სანიოლი: „ვფიქრობ, მარტის მატჩებთან შედარებით დიდი პროგრესი და წინსვლა იყო, რადგან დღეს ხარისხის და ინტენსივობის მხრივ საინტერესო ფეხბურთი ვითამაშეთ. ერთი კვირა გვქონდა მოსამზადებლად, რამაც გავლენა იქონია.
სამ დღეში მეორე მატჩი გვაქვს და იმედი მაქვს, ასევე ვითამაშებთ. ახალმა ფეხბურთელებმა გუნდში სიახლე შემოიტანეს. ჩემი აზრით, ბოლო ერთ წლის განმავლობაში ეს ჩვენი ერთ-ერთი საუკეთესო თამაში იყო.
ირაკლი იეგოიანის თამაშს დიდი ხანია ვუყურებთ, მაგრამ გვსურდა, კლუბში სეზონი სრულად ჩაეტარებინა. მას აქვს ნიდერლანდური ფეხბურთის სკოლა. ისე ითამაშა, თითქოს, გუნდის ახალი წევრი კი არაა, არამედ დიდი ხანია ჩვენთანაა. ქოჩორაშვილის, კიტეიშვილისა და ჩაკვეტაძის გვერდით გვჭირდება ასეთი თვისებების მქონე ფეხბურთელი.
გიზო მამაგეიშვილის თამაში მომეწონა. მისთვის ეს არაა ჩვეული პოზიცია, მაგრამ სწავლობს, ეჩვევა და ყველაფერს აკეთებს, რაც შეუძლია, მარტივად ახერხებს ახალ პოზიციასთან ადაპტირებას”.
საქართველოს ნაკრები მომდევნო ამხანაგურ შეხვედრას 5 ივნისს „მიხეილ მესხზე“ ბაჰრეინთან ჩაატარებს, რომელიც 20:00 საათზე დაიწყება.
ლაშა თაბაგარი
