ჩაკვეტაძის „უოტფორდის“ ზედიზედ მესამე წაგება

„უოტფორდმა“, რომლის შემადგენლობაში გიორგი ჩაკვეტაძე თამაშობს, ინგლისი ჩემპიონშიფში ზედიზედ მესამე შეხვედრა წააგო
ამჯერად, უოტფორდელები სატურნირო ცხრილში უშუალო მეზობელ „შეფილდ უენსდეს“ დაუპირისპირდნენ და მიჯრით მეორე საშინაო შეხვედრაში უქულოდ დარჩნენ – 1:2.
საქართველოს ეროვნული ნაკრების შემტევმა ნახევარმცველმა შეუცვლელად მორიგი შეხვედრა ჩაატარა. მე-13 წუთზე სტუმრები ჰამერმა დააწინაურა, ხოლო მე-20 წუთზე ნგიაკამ საპასუხო ბურთი გაიტანა. 53-ე წუთზე შეფილდელები წინ ბრუკსმა გაიყვანა და დარჩენილ დროში მეტი გოლი აღარ გასულა. „უოტფორდი“ 37 ქულით 24-გუნდიან სატურნირო ცხრილში მეცხრეა.
ლაშა თაბაგარი