„თელავმა“ ზედიზედ მეორედ მოიგო

„თელავმა“ კრისტალბეთ ეროვნული ლიგის განახლების შემდეგ ზედიზედ მეორე მატჩი მოიგო, არადა, მანამდე კახურმა გუნდმა სამი თვე გამარჯვების გემო არ იცოდა. თან გასათვალისწინებელია, რომ ორივეჯერ თელაველებმა სტუმრად გაიმარჯვეს.
21-ე ტურის პირველ სათამაშო დღეს გიორგი მიქაძის გაწვრთნილებმა სტუმრად გათამაშების ერთ-ერთი ლიდერი წყალტუბოს „სამგურალი“ მინიმალური ანგარიშით დაამარცხეს.
თელაველებმა ერთადერთი გოლი 75-ე წუთზე გაიტანეს, როდესაც ირაკლი რუხაძე მარჯვენა ფლანგზე მასპინძელთა ფეხბურთელს გაექცა და საჯარიმოში შესულმა ზუსტი პასი  მირიან ჯიქის გაუკეთა, რომელმაც თავით ზუსტად დაარტყა – 0:1.
გიორგი ჭელიძის შეგირდებმა დარჩენილ დროში მეტოქის კარი ვერ აიღეს და ჩემპიონატის განახლების მერე ჯერ არ მოუგიათ.
„სამგურალი“ 38 ქულით 10-გუნდიან ჩემპიონატში მე-3 ადგილზეა, ხოლო „თელავი“ 17 ქულით მერვეა.
ლაშა თაბაგარი