საქართველომ ტაჯიკეთი გაანადგურა – ელისანდროს პოკერი და ვილიანის სადებიუტო გოლი

საქართველოს ფუტსალისტთა ეროვნულმა ნაკრებმა ევროპის 2022 წლის ჩემპიონატის ფინალური ეტაპის სტარტამდე ბოლო ამხანაგური შეხვედრა ტაჯიკეთთან ჩაატარა.
ავთო ასათიანის გაწვრთნილმა გუნდმა გუშინ ჩატარებული პირველი სპარინგის მსგავსად, აზიელები ისევ დაამარცხა. შეხვედრის მე-4 წუთზე ანგარიში საქართველოს ნაკრების ნატურალიზებულნა ბრაზილიელმა ელისანდრომ გახსნა. ცოტა ხანში არჩილ სებისკვერაძემ პენალტი ვერ გამოიყენა. ამას ტაჯიკებიდან იდრის იოროვის გოლი მოჰყვა. მე-11 წუთზე მასპინძლები კიდევ ერთმა ბრაზილიელმა თალესმა უფრო წინ გაიყვანა, ხოლო რამდენიმე წამში ელისანდრომ დუბლი მიითვალა. მე-12 წუთზე თორნიკე ბუკიას გადაცემის შემდეგ თავი ნიკოლოზ კურტანიძემ გამოიჩინა.
მეორე ტაიმის დაწყებიდან 8 წუთში ელისანდრომ ჰეთ-თრიქი მიითვალა. 32-ე წუთზე, ვილიანმა საქართველოს ნაკრებში დებიუტი გოლით აღნიშნა, ხოლო მცირე ხანში ელისანდრომ პოკერი გაიფორმა. 33-ე წუთზე ბუკიას პასის მერე გოლი გიორგი ღავთაძემ გაიტანა, სამ წუთში კი, კურტანიძემ თავის ანგარიშზე დუბლი ჩაიწერა. საქართველოს ნაკრებიდან წერტილი ირაკლი თოდუამ დასვა – 10:1.
ასათიანმა ისევ დაასვენა ნატურალიზებული ბრაზილიელები რონინიო და ბრუნო პეტრი, რომელთაც მიკროტრავმები აწიხებთ.
საქართველოს ნაკრები 19 იანვარს გრონინგენში გაემგზავრება და ევროპის ჩემპიონატში ჩაერთვება, სადაც D ჯგუფში მოხვდა.
22 იანვარი | გრონინგენი
საქართველო – აზერბაიჯანი
26 იანვარი | გრონინგენი
ბოსნია-ჰერცეგოვინა – საქართველო
29 იანვარი | გრონინგენი
საქართველო – ესპანეთი

საქართველო – ტაჯიკეთი 10:1 (4:1)
საქართველო: ბუკია, შაგინია, თალესი, სებისკვერაძე, ელისანდრო.
სათადარიგოები: კუპატაძე (კ), ჯამბურია, თოფურია, ღავთაძე, კეკელია, ჯვარაშვილი, ჭუმბურიძე, კურტანიძე, ვილიანი.