საქართველოს 21 წლამდე ფეხბურთელთა მთავარმა მწვრთნელმა რამაზ სვანაძემ ევროპის 2025 წლის ჩემპიონატის შესარჩევ ციკლში სტუმრად შვედეთთან 2:3 წაგების შემდეგ განაცხადა, რომ ფეხბურთელების ორმა ინდივიდუალურმა შეცდომამ, მთელი სათამაშო გეგმა არია.
რამაზ სვანაძე: “თამაშის სცენარი, რომელიც წარმოგვედგინა მუშაობდა მეტოქის პირველ გოლამდე და ყველაზე დასანანია, რომ მთელი გეგმა აგვირია ორმა ინდივიდუალურმა შეცდომამ, რომლის დაშვებასაც ასეთ დონეზე არავინ გაპატიებს. სამწუხაროა, რომ მეორე ტაიმის სტარტზევე მესამე გოლი გავუშვით, მაგრამ მეტოქის შეცდომით მალევე შევძელით თამაშში დაბრუნება. მცდელობები ბევრი გვქონდა, მაგრამ საბოლოო ჯამში ვერ ვაჩვენეთ ის თამაშის ხარისხი, თუნდაც ისეთი, როგორიც გვქონდა ამ გუნდთან იგივე ბათუმში.
ბოლო მატჩებია პრობლემები გვაქვს დაცვის ხაზში, მაგრამ ამ ყველაფერს თავისი ახსნა აქვს, ძალიან დაგვაკლდნენ ტრავმირებული ფეხბურთელები და პირველ რიგში მათი გამოცდილება. კონკრეტულად ის გამოცდილება, რომელიც საბა საზონოვს, ლუკა გაგნიძეს და გაბრიელ სიგუას აქვთ. ეს გამოცდილება ზუსტად ასეთი მატჩებისთვის არის საჭირო და დასანანია, რომ ეს მოთამაშეები არ გვყავდა, თუმცა ეს იმას არ ნიშნავს, რომ დღევანდელი მატჩი მხოლოდ მათი არყოფნით არის განპირობებული.
როდესაც ესეთი დონის გუნდთან უშვებ ამდენ ინდივიდუალურ შეცდომას, დგება ის რეალობა რაც დადგა. გარდა ამისა, გუნდურობის საკითხზეც ბევრი გვაქვს სამუშაო, როდესაც ანგარიშში ჩამოვრჩით, თამაშის განვითარების ინდივიდუალურმა ხასიათმა იმატა, რაც ასეთ დროს, ამ კონტექსტის გათვალისწინებით მიუღებელია. მაშინ როცა ეთამაშები შენზე მაღალი კლასის გუნდს, ამ მომენტში გადამწყვეტი ფაქტორი სწორედ გუნდურობა შეიძლება გახდეს.
მთლიანობაში განვლილ გზას და შეკრებას ჯერ ვერ შევაფასებ, დარჩენილი გვაქვს ბოლო ტურის მატჩი, რომელიც აუცილებლად უნდა მოვიგოთ და ასევე, უნდა დაველოდოთ შვედეთის თამაშს ნიდერლანდებში, რომელიც ერთი დღით ადრე გაიმართება და ჩრდილოეთ მაკედონიასთან თამაშის წინ ჩვენ უკვე მათი შედეგი გვეცოდინება. საერთოდ, ყველაზე მეტად ამაზე მწყდება გული, რომ მთელი შესარჩევი მეორე ადგილზე ვიყავით და ბოლო ტურის წინ, ჩვენ ჩვენ თავზე დამოკიდებული აღარ ვართ”.
შვედეთმა 17 ქულა დააგროვა და ბოლო ტურის წინ ქულით გაგვასწრო, 15 ოქტომბერს საქართველოს ნაკრები ქუთაისში ჩრდილოეთ მაკედონიას უმასპინძლებს, ხოლო შვედეთი გასვლაზე ნიდერლანდებს შეხვდება, რომელმაც ევროპირველობის ფინალურ სტადიაზე თამაში გაინაღდა.
მეორე ადგილზე გასვლისთვის, რაც პლეი-ოფის საგზურს იძლევა, საქართველმ თავისი მატჩი აუცილებლად უნდა მოიგოს, ხოლო სკანდინავიელებმა ნიდერლანდები ვერ უნდა დაამარცხონ.
9 ჯგუფის გამარჯვებული მომავალ წელს სლოვაკეთში გასამართ ევროპის ჩემპიონატზე პირდაპირ გადის, ხოლო მათ 3 საუკეთესო მეორეადგილოსანი ემატებათ. დანარჩენი 6 მეორეადგილოსანი პლეი-ოფს ითამაშებს და გამარჯვებულები ფინალური ეტაპის საგზურის მოიპოვებენ. ამ 15 გუნდს მასპინძელი სლოვაკეთი დაემატება.
ლაშა თაბაგარი
