ტაბატაძის ისტორიული დუბლი და თრილერი ყაზახეთის თასის ფინალში

„აკჟაიკის“ ქართველმა თავდამსხმელმა თომა ტაბატაძემ ყაზახეთის თასის ფინალში დუბლი შეასრულა, მაგრამ საბოლოოდ მისი გუნდი საპატიო ჯილდოს ვერ დაეუფლა.
ურალსკელები თასისთვის გადამწყვეტ მატჩში „ორდაბასის“ დაუპირისპირდნენ და მიუხედავად იმისა, რომ 3-ჯერ იგებდნენ, დამატებით დროში დამარცხდნენ.
ტაბატაძე სასტარტო შემადგენლობაში იყო და მე-11 წუთზე, როდესაც მისი გუნდი 1:0 იგებდა, მეტოქის საჯარიმოში მყოფმა წინ გამოსულ მეკარეს ბურთი თავს ზემოთ ზუსტად გადაუგდო.
68-ე წუთზე ტაბატაძემ მარჯვენა ფლანგიდან თანაგუნდელის ჩაწოდების შემდეგ ვარდნაში გაიტანა – 3:2. ის 78-ე წუთზე შეცვალეს, როცა „აკჟაიკი“ 4:3 იგებდა. მის მსგავსად სასტარტოში კიდევ ერთი ქართველი ლეგიონერი ლუკა იმნაძე იყო, რომელმაც მოედანი 70-ე წუთზე დატოვა.
შეხვედრის ძირითადი დრო 4:4 დასრულდა, ხოლო „ორდაბასიმ“ თასი 119-ე წუთზე პენალტის გატანის შემდეგ მოიპოვა.
ტაბატაძე პირველი ქართველი ფეხბურთელია, რომელმაც ყაზახეთის თასის ფინალში დუბლი შეასრულა.
ქართველმა ფორვარდმა თასზე ჩატარებულ 9 შეხვედრაში მეტოქთა კარი 8-ჯერ აიღო. ის თასის გათამაშების საუკეთესო ბომბარდირი გახდა. ცნობისთვის, „აკჟაიკმა“ 14-გუნდიან პრემიერ ლიგაში ბოლო ადგილი დაიკავა და გავარდა.