ჰუმელსი კარიერას ასრულებს

მათს ჰუმელსი მიმდინარე სეზონის ბოლოს საფეხბურთო კარიერას დაასრულებს. „რომას“ გერმანელმა მცველმა ამის შესახებ თავის სოციალურ ქსელში დაწერა.
36 წლის ჰუმელსი „ბაიერნის“ აღზრდილია, სადაც ყველა ტურნირში 118 მატჩი ჩაატარა და 8 გოლი გაიტანა. ის მიუნხენელთა შემადგენლობაში გერმანიის ჩემპიონი 3-ჯერ გახდა, ერთხელ თასი მოიგო, ხოლო 2-ჯერ – სუპერთასი.
მან კარიერის დიდი ნაწილი დორტმუნდის „ბორუსიაში“ გაატარა, რომლის შემადგენლობაში 508-ჯერ ითამაშა და მეტოქეთა კარი 37-ჯერ აიღო. ჰუმელსმა „ბორუსიას“ მაისურით ბუნდესლიგაში 2-ჯერ გაიმარჯვა, ხოლო ამდენჯერვე თასი და სუპერთასი აღმართა. გარდა ამისა, ორჯერ ჩემპიონთა ლიგის ფინალში ითამაშა და დამარცხდა.
მან გერმანიის ეროვნულ ნაკრებში 78 შეხვედრა გამართა და 5 გოლი მიითვალა. ჰუმელსმა გერმანელებთან ერთად ბრაზილიაში 2014 წელს გამართულ მსოფლიო ჩემპიონატზე ოქროს მედლები მოიგო.
ლაშა თაბაგარი