„დინამომ“ ბოლო წუთზე მოიგო, ბათუმელებმა „სამგურალი“ „დაბომბეს“

კრისტალბეთ ეროვნული ლიგის მე-6 ტურის მეორე სათამაშო დღეს ორივე ლიდერმა მოიგო.
გია ჭიაბრიშვილის გაწვრთნილი თბილისის „დინამო“ ბათუმში ანგისას საწვრთნელ ბაზაზე ქობულეთის „შუქურას“ შეხვდა და მინიმალური სხვაობით დაამარცხა.
მე-2 წუთზე თბილისელთა მეკარე დავით კერესელიძე პასს თანაგუნდელს უკეთებდა, მაგრამ მიშიკო სარდალიშვილს მოახვედრა ბურთი, რომელიც მიუვიდაგია აფხაზავას, ამ უკანასკნელს კი, ანგარიშის გახსნა არ გაჭირვებია – 1:0.
32-ე წუთზე „დინამომ“ მარჯვენა ფლანგიდან კუთხური ჩააწოდა და ოსეი ბარნსის მიერ ქუსლით გაკეთებული პასის შემდეგ, დავით კობოურმა თავურით ანგარიში გაათანაბრა.
ძირითადი დროსთვის დამატებულ მე-3 წუთზე საქართველოს ეროვნული ნაკრების დებიუტანტი გაბრიელ სიგუა მეტოქის საჯარიმოში მარჯვენა ფლანგიდან შეიჭრა და გადაცემა სერბ ზორან მარუშიჩს გაუკეთა, რომელმაც ახლო მანძილიდან ვარდნაში ერთი შეხებით დარტყმით სტუმრებს 3 ქულა მოუტანა.
„დინამო“ 16 ქულით 10-გუნდიან ჩემპიონატს ლიდერობს, ხოლო უჩა სოსიაშვილის თავკაცობით „შუქურამ“ 3 ქულა დააგროვა და მეცხრეა.
ტურის ცენტრალურ შეხვედრაში ბათუმის „დინამომ“ წყალტუბოს „სამგურალი“ მიიღო და 2 უპასუხო ბურთი გაუტანა. გია გეგუჩაძის გუნდმა „აჭარაბეთ არენაზე“, სადაც ცარიელი ადგილი ბევრი იყო საქმე პირველ ტაიმში მოამთავრეს. შეხვედრის მე-8 წუთზე პაატა ღუდუშაურმა დაახლოებით 20 მეტრიდან შორეულ კუთხეში ძლიერად დაარტყა და ეფექტური გოლი გაიტანა. 24-ე წუთზე თანაგუნდელს არც სანდრო ალთუნაშვილი ჩამორჩა, რომელმაც 25 მეტრიდან „გაისროლა“ და მეკრე ლევან შოვნაძე ამჯერადაც უძლური აღმოჩნდა.
ბათუმელები 16 ქულით მე-2 ადგილზე არიან და ლიდერ თბილისელ თანამოსახელეებს გატანილ-გაშვებული გოლების უარესი სხვაობით ჩამორჩებიან. გიორგი ჭელიძის დამოძღვრილი „სამგურალი“, რომელსაც სეზონის წინ სამეულისთვის ბრძოლის ამბიცია ჰქონდა, 7 ქულით მეექვსეა.
კრისტალბეთ ეროვნული ლიგის მე-7 ტურის მატჩები 8 და 9 აპრილს ჩატარდება.

ა		კლუბი	თ	±	ქ
1.		დინამო თბ	6	10	16
2.		დინამო ბთ	6	9	16
3.		ტორპედო	6	5	12
4.		საბურთალო	6	2	9
5.		დილა	6	2	9
6.		სამგურალი	6	-3	7
7.		თელავი	6	-2	5
8.		სამტრედია	6	-7	4
9.		შუქურა	6	-5	3
10.		გაგრა	6	-11	1

ლაშა თაბაგარი