ბათუმელებმა აჭარული დერბი მოიგეს, თეთრაძის საყაიმო დებიუტი

კრისტალბეთ ეროვნული ლიგის შარშანდელმა ვიცეჩემპიონმა ბათუმის „დინამომ“ ახალი სეზონი აჭარულ დერბიში გამარჯვებით დაიწყო.
გია გეგუჩაძის გაწვრთნილმა გუნდმა საშინაო არენაზე ელიტაში დაბრუნებულ ქობულეთის „შუქურას“ უმასპინძლეს და 2:1 გაიმარჯვეს.
მატჩის პირველი ტაიმისთვის დამატებულ მე-2 წუთზე ანგარიში ბათუმელთა ახალწვეულმა ირაკლი ბიძინაშვილმა გახსნა, რომლის დარტყმის შემდეგ ბურთი ცოტნე ფაცაციას მოხვდა და კარში აღმოჩნდა – 1:0.
61-ე წუთზე ფაცაციამ პენალტიდან საპასუხო ბურთი გაიტანა. ბათუმელებმა ვლადიმერ მამუჩაშვილმა მოაგებინა, რომელმაც 74-ე წუთზე თერთმეტმეტრიანი გამოიყენა.
დღესვე, თბილისის „საბურთალომ“ საქართველოს ფეხბურთის ფედერაციის ტექნიკურ ცენტრში ქუთაისის „ტორპედო“ მიიღო და გუნდებმა ქულები გაიყვეს – 0:0. გასულ შეხვედრაში „საბურთალოს“ მთავარი მწვრთნელის თანამდებობაზე ომარ თეთრაძის ოფიციალური დებიუტი შედგა, რომელსაც მანამდე საქართველოს ჩემპიონატში არასოდეს უმუშავია. ის ფეხბურთელობისას ეროვნულ პირველობაზე ოზურგეთის „მერცხალში“ გამოდიოდა, ვიდრე კარეირას რუსეთში გააგრძელებდა.