„ურალის“ მწვრთნელი გაგნიძეზე: „მოგების შემთხვევაში ვიტყოდი, რომ კარგი დებიუტი ჰქონდა“

რუსეთის საფეხბურთო პრემიერ ლიგაში ლუკა გაგნიძის დებიუტი შედგა.

ეკატერინბურგის „ურალმა“, სადაც 18 წლის ქართველი ნახევარმცველი მოსკოვის „დინამომ“ გაანათხოვრა, „ნიჟნი ნოვგოროდს“ უმასპინძლა და გუნდებმა ქულები გაიყვეს – 1;1.

გაგნიძე თამაშში 57-ე წუთზე ჩაერთო, როდესაც ორივე გოლი გატანილი იყო. მასპინძლები 31-ე წუთზე დაწინაურდნენ, ხოლო სტუმრებმა ანგარიში 55-ე წუთზე გაათანაბრეს.

სხვათა შორის, შეხვედრის 85-ე წუთზე ეკატერინბურგის სტადიონზე შუქი ჩაქრა და ელექტროენერგიის მიწოდება ხუთ წუთში აღდგა.

„ურალის“ მთავარმა მწვრთნელმა იური მატვეევმა გაგნიძის დებიუტი ასე შეაფასა:

„დებიუტისთვის მოედანზე კარგად მოქმედებდა – ბურთს ინარჩუნებდა და თამაშს ხელმძღვანელობდა. მოგების შემთხვევაში ვიტყოდი, რომ კარგი დებიუტი ჰქონდა, ისე კი, მომავალს პოზიტიურად ვუყურებთ“.