ბრაზილიის ეროვნულმა ნაკრებმა კოპა ამერიკაზე ჯგუფში ზედიზედ მესამე თამაში მოიგო და პირველი ადგილი გაინაღდა.
ტიტეს შეგირდები რიო დე ჟანეიროს ნილტონ სანტოსის სახელობის სტადიონზე კოლუმბიას შეხვდნენ და 3 ქულა მატჩის მიწურულს აიღეს.
შეხვედრაში ანგარიში მე-10 წუთზე ულამაზესი მაკრატელათი ლუის დიასმა გახსნა.
კოლუმბიელებმა პირველი ტაიმი მოიგეს, ხოლო 78-ე წუთზე საპასუხო ბურთი რობერტო ფირმინომ გაიტანა.
მთავარმა მსაჯმა ძირითად დროს 10 წუთი დაამატა და ნეიმარის ჩაწოდების მერე კაზემირომ თავით „სელესაოს“ 3 ქულა მოუტანა. ბრაზილიელები ჯგუფს 9 ქულით ლიდერობენ. კოლუმბია 4 ქულით მეორე ადგილზეა.
B ჯგუფის მეორე შეხვედრაში ეკვადორმა და პერუმ ქულები გაიყვეს.
ეკვადორელებმა პირველი ტაიმი 2:0 მოიგეს – პერუელმა ტაპიამ ბურთი საკუთარ კარში 23-ე წუთზე ჩაჭრა, ხოლო პრესიედომ თავისი გუნდი კიდევ უფრო შესვენებაზე გასვლამდე ცოტა ხნით ადრე დააწინაურა.
49-ე წუთზე ლაპადულამ ანგარიშში სხვაობა შეამცირა, 54-ეზე კი, კარილიომ თანაფარდობა აღადგინა.
პერუ 4 ქულით მესამე პოზიციაზე, ხოლო ეკვადორი 2 ქულით – მეოთხეა. ვენესუელა ასევე 2 ქულით ბოლო მე-5 პოზიციაზეა.
