ჩემპიონთა ლიგის მეოთხედფინალური ეტაპის საპასუხო შეხვედრაში კატალონიის ,,ბარსელონამ” ,,მანჩესტერ იუნაიტედს” უმასპინძლა და 3-0 დაამარცხა. მატჩი სტუმრებმა აქტიურად დაიწყეს – პირველივე წუთზე მარკუს რაშფორდმა ბურთი ხარიხას მოარტყა. ერნესტო ვალვერდეს გუნდმა დაწინაურება მე-16 წუთზე შეძლო – თავი ლეო მესიმ გამოიჩინა, რომელმაც მეოთხედფინალში გოლი 2013 წლის შემდეგ პირველად გაიტანა. მე-20 წუთზე არგენტინელმა დუბლი გაიფორმა. კატალონიელები უპირატესობას შეხვედრის მეორე ნახევარშიც ფლობდნენ. 61-ე წუთზე ფილიპე კოუტინიომ შორეული დარტყმით საბოლოო ანგარიში დააფიქსირა.
,,ბარსელონას” თავდამსხმელმა, ლეო მესიმ ,,იუნაიტედთან” მოგებულ მატჩზე ისაუბრა: ,,ეს შთამბეჭდავი იყო. ეს არის სწორედ ის, რასაც წარმოვადგენთ. პირველი ხუთი წუთის განმავლობაში ცოტას ვნერვიულობდით, მაგრამ შემდეგ გავიტანეთ და შესანიშნავი ფეხბურთი ვითამაშეთ”, – მესის სიტყვებს უეფას ოფიციალური ვებგვერდი ციტირებს.
