პირველად კოპა ლიბერტადორესის ისტორიაში – ერთი ქვეყნის სამი გუნდი ნახევარფინალში

კოპა ლიბერტადორესის გათამაშება ჯერ არ დასრულებულა, მაგრამ უკვე ისტორიული აღმოჩნდა.

საქმე ისაა, რომ ტურნირის არსებობოს ხანგრძლივი ისტორიის მანძილზე პირველად ნახევარფინალში ერთი ქვეყნის სამი კლუბი ითამაშებს.

სამივე მათგანი ბრაზილიურია: „პალმეირასი“, „ატლეტიკო მინეირო“ და „ფლამენგო“.

სხვათა შორის, გამორიცხული არაა, რომ მეოთხე ნახევარფინალისტიც ბრაზილიის წარმომადგენელი აღმოჩნდეს. ეს იმ შემთხვევაში მოხდება თუ „ფლუმინენსე“ სტუმრად ეკვადორის „ბარსელონას“ დაამარცხებს. პირველი მატჩი რიო დე ჟანეიროში 2:2 დასრულდა.

ნახევარფინალის პირველი მატჩები 22 სექტემბერს შედგება, ხოლო საპასუხო – 29 სექტემბერს.

კოპა ლიბერტადორესის მიმდინარე გათამაშების ფინალი 27 ნოემბერს ურუგვაის დედაქალაქ მონტევიდეოში სტადიონ „სენტენარიოზე“ გაიმართება.