ლუჩესკუ უკრაინული ფეხბურთის ისტორიაში შევიდა

კიევის „დინამოს“ მთავარი მწვრთნელი მირჩა ლუჩესკუ უკრაინის ფეხბურთის ისტორიაში შევიდა.

75 წლის რუმინელი სპეციალისტი პირველია, რომელმაც უკრაინის ჩემპიონატი როგორც დონეცკის „შახტარს“, ასევე კიევის „დინამოს“ მოაგებინა.

უკრაინის პრემიერ ლიგის 23-ე ტურში ლუჩესკუს გაწვრთნილმა კიეველებმა შინ ნიკა სიჭინავას „ინგულეცი“ 5:0 დაამარცხეს და ოქროს მედლებს სეზონის დასრულებამდე 3 ტურით ადრე დაეუფლნენ. კიეველებს 2015-2016 წლების სეზონის შემდეგ, უკრაინის ჩემპიონატი არ მოეგოთ.

ლუჩესკუს 2004-2016 წლებში დონეცკის „შახტარს“ ავარჯიშებდა და უკრაინის პირველობა 8-ჯერ მოაგებინა. ის „დინამოში“ 2020 წლის ზაფხულიდან მუშაობს. რუმინელმა კარიერაში 34-ე ტიტული მოიპოვა.

23-ე ტურში „შახტარი“ სტუმრად „ოლექსანდრიას“ შეხვდა და 0:2 წააგო. საქართველოს ნაკრების მცველმა დავით ხოჭოლავამ დამარცხებულებში შეუცვლელად ითამაშა და 73-ე წუთზე ყვითელი ბარათი მიიღო.

აღსანიშნავია, რომ ბოლო 14 წლის მანძილზე პირველად „შახტარმა“ ერთი ტიტულიც ვერ მოიგო.