ლევან კობიაშვილი: “ყველაზე მნიშვნელოვანია გუნდმა შეძლოს ამ მარცხის ღირსეულად მიღება”

0
1

საქართველოს ფეხბურთის ფედერაციის პრეზიდენტი ლევან კობიაშვილი ერთა ლიგის 2026-2027 წლების გათამაშებაში B ლიგის მე-2 ჯგუფში ჩვენი ეროვნული ნაკრების მიერ 2 ქულით ბოლო ადგილზე გასვლას სოციალურ ქსელში გამოეხმაურა:
“უეფას ერთა ლიგის ბოლო გათამაშება დიდი იმედგაცრუებით დასრულდა. გულდაწყვეტილი დარჩა თითოეული გულშემატკივარი, ვისთვისაც ფეხბურთი მხოლოდ სპორტი არაა. ეს არის ემოცია, ერთიანობა და ხშირად ის განსაკუთრებული იმედი, რომელიც მთელი ქვეყნის განწყობას განსაზღვრავს.
იმედგაცრუებული ვართ ყველა, ვისაც ამ ბრძოლაში სხვა შედეგის იმედი ჰქონდა, ვისაც სჯეროდა, რომ ჩვენი გუნდი გაცილებით მეტს შეძლებდა და ამ გათამაშებას სხვაგვარი დასასრული ექნებოდა. ყველაზე რთული სწორედ ის არის, რომ ამ მოლოდინს საფუძველი ჰქონდა. სულ ცოტა ხნის წინ ამავე გუნდმა გვაჩვენა, რამდენად დიდი შესაძლებლობები აქვს და რამდენად დიდი ემოციების ჩუქება შეუძლია საკუთარი ქვეყნისთვის.
ფეხბურთს ახლავს რთული პერიოდები და ეს ჩვენი რეალობისთვის უცხო არაა. თუმცა ყველაზე მნიშვნელოვანი სწორედ ასეთ დროს ვლინდება, რამდენად შეგვიძლია რეალობისთვის თვალის გასწორება, შეცდომების აღიარება და საკუთარი თავისგან უფრო მეტის მოთხოვნა.
წარუმატებლობის მიზეზების სხვებში ძიება ყველაზე მარტივი გზაა, მაგრამ ცვლილებები მხოლოდ მაშინ იწყება, როდესაც თითოეული ჩვენგანი საკუთარ პასუხისმგებლობას აცნობიერებს. ჩემთვის ეს შედეგი განსაკუთრებით გულდასაწყვეტია. მტკივნეულია იმის გააზრება, რომ სწორედ ამ გუნდის უმრავლესობა სულ ცოტა ხნის წინ იყო იმ უდიდესი საფეხბურთო ზეიმის მონაწილე, რომელმაც მთელი საქართველო გააერთიანა.
ესენი არიან ადამიანები, რომლებმაც გვაჩუქეს დაუვიწყარი ემოციები, სიამაყის განცდა და რწმენა იმისა, რომ ერთად შეუძლებელი არაფერია. სწორედ ამიტომაა დღევანდელი იმედგაცრუება კიდევ უფრო მძიმე. ჩვენ ვიცით, რისი გაკეთება შეუძლია ამ გუნდს და გვჯერა, რომ მისი შესაძლებლობები გაცილებით მეტია, ვიდრე ბოლო შედეგებმა გვაჩვენა.
ამ მატჩებმა დაგვანახა, რომ საერთო მიზნის მისაღწევად აუცილებელია თითოეული ადამიანის მაქსიმალური პასუხისმგებლობა, სწორი დამოკიდებულება, შეუპოვრობა, ყოველდღიური შრომა და ბოლომდე ბრძოლის სურვილი. გუნდურ წარმატებას თითოეული ადამიანის წვლილი ქმნის და როდესაც შედეგი არ მოდის, ყველამ უნდა შევძლოთ საკუთარ თავში იმ მიზეზების დანახვა, რომელთა შეცვლაც ჩვენს ძალებშია.
არავის უნდა ჰქონდეს განცდა, რომ საკუთარი ვალდებულება სრულად შეასრულა, როდესაც საერთო მიზანს ვერ მივაღწიეთ. სწორედ ახლააა დრო, საკუთარ თავს ყველაზე რთული კითხვები დავუსვათ, ვიყოთ გულწრფელები საკუთარ თავთან და არა მხოლოდ სიტყვებით, არამედ საქმით დავამტკიცოთ, რომ ამ შედეგის შეცვლა ერთად შეგვიძლია.
ახლა ყველაზე მნიშვნელოვანია, გუნდმა შეძლოს ამ მარცხის ღირსეულად მიღება, ტკივილის სწორ მოტივაციად გარდაქმნა და ახალი ენერგიით დაბრუნება. უნდა დავივიწყოთ წარუმატებლობა, მაგრამ არასდროს უნდა დავივიწყოთ ის გამოცდილება, რომელიც ამ პერიოდმა მოგვცა. მჯერა, რომ ამ გუნდს აქვს რესურსი, დაძლიოს არსებული სირთულეები და კიდევ ერთხელ აჩუქოს ჩვენს ქვეყანას ის ემოციები, რომლებიც ასე ძალიან დაგვაკლდა.
უნდა გვახსოვდეს, რომ ფეხბურთისგან მიღებული ყველაზე დიდი სიამოვნება მხოლოდ გამარჯვება არაა – ესაა გზა, რომელსაც ერთად გავდივართ, ბრძოლა, რომელსაც საერთო მიზნისთვის ვაგრძელებთ და სიამაყე, რომელსაც საკუთარი ქვეყნის სახელით გვანიჭებს თითოეული წარმატება.
ამ გზაზე ინდივიდუალურ შესაძლებლობებზე მაღლა ყოველთვის უნდა იდგეს გუნდი, საერთო პასუხისმგებლობა და ერთმანეთისთვის ბოლომდე ბრძოლის მზადყოფნა.არასდროს უნდა დაგვავიწყდეს ჩვენი მაისურის მთავარი გზავნილი – “ძალა ჩემშია” და ის სიტყვები, რომლებიც მხოლოდ სლოგანი არაა და მთელი ქვეყნის ერთიანობას გამოხატავს – “მე ვარ საქართველო”. ამ სიტყვების მნიშვნელობა ყოველდღიურ დამოკიდებულებაში, ერთმანეთის მხარდაჭერასა და საერთო მიზნისთვის თავდადებაში უნდა გამოიხატებოდეს.
მინდა და მჯერა, რომ ახალი სანაკრებო ციკლიდან ჩვენი გუნდი შეძლებს დაკარგული ემოციების, ნდობისა და იმ განსაკუთრებული სიამაყის დაბრუნებას, რომელიც ასე ახლოს გვქონდა.
გვჯერა ამ გუნდის, მაგრამ ამ რწმენას უნდა მოჰყვეს რეალური ცვლილებები, დაუღალავი შრომა და შედეგი. ჩვენი მიზანი მხოლოდ წარსული წარმატებების გახსენება არ უნდა იყოს. ჩვენ გვჭირდება ახალი წარმატებები და ახალი საფეხბურთო ზეიმი.
მადლობა უნდა ვუთხრათ იმ ადამიანებს, რომლებიც როგორც საქართველოს სტადიონებზე, ისე ქვეყნის ფარგლებს გარეთ, სხვადასხვა სტადიონის ტრიბუნებზე დაუღალავად და ერთგულად ქომაგობენ საკუთარი ქვეყნის ნაკრებს. გულშემატკივარს აქვს უფლება, ელოდოს მეტს და იამაყოს თავისი ნაკრებით. ჩვენ კი გვაქვს პასუხისმგებლობა, გავამართლოთ ეს მოლოდინი.
წინ ახალი სანაკრებო ციკლია, ახალი გამოწვევებითა და შესაძლებლობებით. მჯერა, რომ ამ გუნდს კიდევ შეუძლია მთელი საქართველოს გაერთიანება ერთი დიდი მიზნის გარშემო – ევროპის ჩემპიონატის საგზურისთვის ბრძოლა და ჩვენი ქვეყნისთვის კიდევ ერთი დაუვიწყარი საფეხბურთო ისტორიის შექმნა ჩვენმა გუნდმა იცის, რა შეუძლია. ახლა მთავარია, ეს კიდევ ერთხელ დავამტკიცოთ”.
საქართველოს ნაკრებმა ერთა ლიგაში გამოსვლა მოგებისა და გატანილი გოლის გარეშე დაასრულა. მეტიც, ერთა ლიგის ოთხი ლიგაში საქართველო ერთადერთია, რომელმაც ჯგუფური ეტაპი უგოლოდ დაამთავრა. მიმდინარე წელს ჩვენ ნაკრებს ოფიციალურ თამაშში გოლი არ გაუტანია – 2025 წლის 18 ნოემბერს ბულგარეთთან წაგებულ შეხვედრაში თავი ლუკა ლოჩოშვილმა გამოიჩინა. საქართველოს ნაკრებმა თითო ქულა სახლში უკრაინასთან (0:0) და სტუმრად ჩრდილოეთ ირლანდიასთან (0:0) მოიპოვა. ჩვენმა გუნდმა გოლი ზედიზედ ექვს ოფიციალურ თამაშში ვერ გაიტანა, რაც არასოდეს მომხდარა. მანამდე, ყველაზე ცუდი სერია 2013 წელს იყო, როცა მეტოქეთა კარი მიჯრით 4 თამაშში ვერ ავიღეთ.
საქართველოს ნაკრებს ოფიციალურ მატჩებში 10-მატჩიანი მოუგებელი სერია აქვს (ბოლოს ბულგარეთს მოუგო 2025 წელს, 3:0). ბოლო ორ ოფიციალურ ტურნირში (ერთა ლიგა და მსოფლიო ჩემპიონატის შესარჩევი) საქართველოს ნაკრებმა მხოლოდ ერთი თამაში მოიგო (იმავე ბულგარეთთან) და ჯამში მხოლოდ 5 ქულა აიღო (3 მუნდიალის შესარჩევში, 2 ერთა ლიგაში). ეროვნულმა გუნდმა პირველად დაამთავრა რომელიმე ტურნირის შესარჩევი ეტაპი გატანილი გოლის გარეშე.
საქართველოს ნაკრები ერთა ლიგის გათამაშებაში მეხუთედ მონაწილეობდა და ეს ტურნირი პირველად დაასრულა ისე, რომ თამაში ვერ მოიგო. მანამდე, ნაკრებს ასეთი რამ მხოლოდ მსოფლიოს ჩემპიონატის შესარჩევებში დაემართა ორჯერ (2008/2009 და 2015/2016).
საქართველოს ნაკრები მომავალი წლის გაზაფხულზე B ლიგაში დასარჩენ პლეი-ოფში C ლიგის ჯგუფებში ერთ-ერთ მეორეადგილოსანს დაუპირისპირდება. ჩვენი გუნდის სავარაუდო მეტოქეები ბელარუსის, კვიპროსის, ფარერის კუნძულებისა და ესტონეთის ნაკრებები არიან. წილისყრა 20 ნოემბერს გაიმართება, პლეი-ოფის შეხვედრები კი 2027 წლის მარტში ჩატარდება. ერთა ლიგაში დაფიქსირებული შედეგიდან გამომდინარე, საქართველოს ნაკრები ევრო 2028 შესარჩევ ციკლში 4-გუნდიან ჯგუფში იასპარეზებს.
ლაშა თაბაგარი