საქართველოს ეროვნული ნაკრების ის შემადგენლობა, საიდანაც ევრობასკეტისთვის 12 კალათბურთელი შეირჩევა, ცნობილია. სერბმა სპეციალისტმა, ალეკსანდარ ჯიკიჩმა, რომელიც საქართველოს ნაკრებს სათავეში ევრობასკეტის საკვალიფიკაციო ტურნირის წინ ჩაუდგა და ფინალურ ეტაპზე გაიყვანა, 16-კაციანი შემადგენლობა დაასახელა. ეს 16 კალათბურთელი 28 ივლისიდან ლატვიაში დაიწყებს ვარჯიშებს, მთლიანობაში 6 მოსამზადებელ მატჩს ჩაატარებს და აგვისტოს ბოლოს კვიპროსში, ევროპის ჩემპიონატში ჩაებმება.
შემადგენლობაში ევროპაში მოთამაშე ლეგიონერებთან ერთად ამერიკის ნაციონალური საკალათბურთო ლიგის კალათბურთელები არიან. გოგა ბითაძეს და სანდრო მამუკელაშვილს ევრობასკეტის შესარჩევი ტურნირის 6 მატჩში გასაგები მიზეზის გამო არ უთამაშიათ, თუმცა ევრობასკეტის მსვლელობისას ნბა-ში სეზონთშორისი პერიოდია და იქ მოთამაშე კალათბურთელები საკუთარი ქვეყნის ნაკრებში ასპარეზობენ.
გაფართოებულ შემადგენლობაში 7 სუპერლიგის მოთამაშეა, ერთიც ამერიკელი გამთამაშებელი, ნატურალიზებული საქართველოს მოქალაქე, კამარ ბოლდუინი. ამ შემადგენლობით საქართველოს ნაკრები შეკრებას ლატვიის კურორტ იურმალაში დაიწყებს, სადაც ერთკვირიანი ვარჯიშების შემდეგ 2 სპარინგ-მატჩს – ისრაელთან და ესტონეთთან გამართავს.
მთლიანობაში, საქართველო 6 მოსამზადებელ მატჩს გამართავს ევროპის 4 ქვეყანაში – ლატვიაში, ლიეტუვაში, პოლონეთში და ჩეხეთში. სწორედ ჩეხეთიდან, 25 აგვისტოს, საქართველოს ნაკრები კვიპროსში გაემგზავრება, სადაც 28 აგვისტოს ევრობასკეტის ჯგუფური ეტაპის პირველ მატჩს ესპანეთთან გამართავს.
საქართველოს ნაკრების გაფართოებული შემადგენლობა: რატი ანდრონიკაშვილი, სანდრო მამუკელაშვილი, კახაბერ ჯინჭარაძე, ბექა ბურჯანაძე, გიორგი შერმადინი, დუდა სანაძე, გიორგი კორსანტია, სანდრო სანაძე, ალექსანდრე ფევაძე, თორნიკე შენგელია, გიორგი სულაბერიძე, ლუკა მაზიაშვილი, გოგა ბითაძე, კამარ ბოლდუინი, გიორგი ოჩხიკიძე და ილია ლონდარიძე.
