თორნიკე შენგელიას ლიდერობით ბარსელონამ ათენში, ბერძნული გრანდი დაამარცხა. ევროლიგის ახალი სეზონის წარუმატებლად დაწყებისა და თელ ავივის ჰაპოელთან მარცხის შემდეგ ბარსელონამ პანათინაიკოსი ოაკა-ს დარბაზში დაამარცხა. დაძაბული შეხვედრა კატალონიელებმა 103:96 მოიგეს და 2 ტურის შემდეგ თითო მოგებ-წაგებით არიან.
საქართველოს ნაკრების კაპიტანი კატალონიური გრანდის სასტარტო ხუთეულში გამოჩნდა და ერთ-ერთი საუკეთესო იყო. მან მოედანზე 25:22 წუთი გაატარა და 17 ქულა, 5 მოხსნა და 1 დაფარება მიითვალა. შენგელიამ 4-ვე ორქულიანი, 4-დან 2 სამქულიანი და 3-ვე საჯარიმო ჩააგდო, 4 პერსონალური ფოლი მიიღო, მის წინააღმდეგ კი 3-ჯერ დაჯარიმდნენ.
ბარსელონას რიგებში ყველაზე შედეგიანი ვილ კლაიბერნი იყო 23 ქულით, პანათინაიკოსს კი 27 ქულითა და 8 მოხსნით ხუანჩო ერნანგომესმა ულიდერა.
ბარსელონას ევროლიგაში მომდევნო მატჩი 10 ოქტომბერს, შინ, ვალენსიასთან ელის, 5-ში კი, ესპანეთის ლიგა ენდესაშიც ჩაებმება და იმავე ვალენსიას უკვე სტუმრად ეთამაშება.
