შერმადინის 10 ქულა, 8 მოხსნა და წაუგებლად მოპოვებული მეოთხედფინალი

0
14

“ტენერიფემ”, რომლის ლიდერიც გიორგი შერმადინი გახლავთ, ფიბა-ს ჩემპიონთა ლიგაში მორიგი მატჩი მოიგო. ეს გახლდათ ტოპ-16-ის ჯგუფური ეტაპის ბოლო მატჩი, რომელსაც 5-დან 5 მოგების მქონე და ამით პირველობაგანაღდებულ ტენერიფელთათვის მნიშვნელობა არ ჰქონდა. შერმადინის გუნდმა ფრანგულ “სტრასბურს” უმასპინძლა და დაძაბული შეხვედრა მაინც მოიგო – 71:66. ტენერიფე ერთადერთი გუნდი გახდა, რომელმაც ტოპ-16-ის ეტაპი წაუგებლად დაასრულა.
თამაში დაძაბულად, მასპინძელთა მცირე უპირატესობით წარიმართა. სტრასბურს ჰქონდა შანსი, როდესაც ბოლო მეოთხედში 4-ქულიანი სხვაობით იგებდა, თუმცა ბოლო წუთები ტენერიფემ უკეთესად ჩაატარა და საბოლოოდ თამაში მოიგო კიდეც.
გიორგი შერმადინი თამაშში სათადარიგოთა სკამიდან ჩაერთო და მოედანზე ჯამში 19:53 წუთი გაატარა, რა დროშიც 10 ქულა, 8 მოხსნა (3 მეტოქის ფარზე) და 1 დაფარება მიითვალა. ქართველმა ცენტრმა 8-იდან 3 ორქულიანი ჩააგდო და 4-იდან ყველა საჯარიმო გამოიყენა. შერმადინის ანგარიშზე ასევე 3 დაკარგვა და 4 ფოლია, მისი მარგი ქმედების კოეფიციენტმა კი 11 შეადგინა.
“ტენერიფეს” წინ მეოთხედფინალური ეტაპი აქვს, რომლის სერიაც 2 მოგებამდე გაგრძელდება. შერმადინი მეტოქეს მოგვიანებით, კენჭისყრის შედეგად შეიტყობს. “ტენერიფესთან” ერთად ევროთასის მეოთხედფინალში გავიდნენ: ჰაპოელ ჰოლონი (ისრაელი), ლუდვიგსბურგი (გერმანია), მანრესა (ესპანეთი), თოფაში (თურქეთი), კლუჟ-ნაპოკა (რუმინეთი), უნიკახა (ესპანეთი) და სტრასბური (საფრანგეთი).