ზვიად კუპატაძე: “ეს ჩვენი მაქსიმუმი არაა, მსოფლიო ჩემპიონატზე უნდა გავიდეთ”

0
17

ზვიად კუპატაძეს მიაჩნია, რომ საქართველოს ფუტსალისტთან ნაკრებისთვის ევროპის ჩემპიონატის 1/4-ფინალში თამაში მაქსიმუმი არაა და ახლა ისტორია მსოფლიო ჩემპიონატზე უნდა გადაწერონ.
ეროვნული გუნდის კაპიტანმა ამის შესახებ ევრო-2022-ის 1/4-ფინალში რუსეთთან 1:3 მარცხის მერე განაცხადა:
“დიდი მადლობა ბიჭებს. ყველაფერი ჩადეს წარმატებისთვის, ყველამ იომა, მადლობა ნაკრების თითოეულ წევრს, ყველამ მაქსიმუმი გააკეთა ამ ევროპის ჩემპიონატზე.
ვიცი, ამ დონის თამაშები როგორ წარიმართება და როგორი რთულია ემოციურად. ჩემი მიზანი იყო სპორტის ეს სახეობა ყველას გაეცნო და გამხდარიყო უფრო პოპულარული.
ეს არ არის ჩვენი მაქსიმუმი. ახლა, ისტორია უნდა გადავწეროთ მსოფლიო ჩემპიონატზე. ჩვენი შემდეგი მიზანი მსოფლიო ჩემპიონატზე გასვლაა”.
ირაკლი თოდუა: “პირველი ორი თამაშის მოგების შემდეგ, ჯგუფში ჩვენი პროგრამა მაქსიმუმი შევასრულეთ და საუკეთესო რვა გუნდში მოვხვდით. რუსეთის ძლიერ ნაკრებთან რაც შეგვეძლო, ყველაფერი ჩავდეთ. დარწმუნებული ვარ, გულშემატკივარმა ეს დაინახა.
ვაგრძელებთ ახალი მიზნისთვის ბრძოლას და ვიწყებთ მზადებას მსოფლიო ჩემპიონატის საკვალიფიკაციო ეტაპისთვის“.