კიტეიშვილის გოლი და ევროპა ლიგა – „შტურმს“ ჩემპიონთა ლიგის შანსიც აქვს

გრაცის „შტურმმა“, სადაც ოთარ კიტეიშვილი გამოდის, ევროპა ლიგის საკვალიფიკაციო ეტაპზე თამაში გაინაღდა.

გრაცელებმა შინ ვენის „რაპიდი“ 4:1 დაამარცხეს და თავისი გუნდის წარმატებაში მნიშვნელოვანი წვლილი საქართველოს ეროვნული ნაკრების ნახევარმცველმაც შეიტანა.

კიტეიშვილმა შეუცვლელად ითამაშა და მე-60 წუთზე, როდესაც მისი გუნდი 0:1 აგებდა, ანგარიში გაათანაბრა.

79-ე წუთზე, როცა „შტურმი“ 2:1 იგებდა, კიტეიშვილის პასით კუენმა ანგარიში კიდევ უფრო გაზარდა.

მიმდინარე სეზონში ქართველმა 7 გოლი გაიტანა და 4 საგოლე პასი გააკეთა, რაც ავსტრიაში გადასვლის შემდეგ მისი საუკეთესო შედეგია.

„შტურმს“ პირველ ექვსეულში 33 ქულით მე-3 ადგილი უკავია და ბოლო ტურში თუ სტუმრად „ვოლსფერგერს“ დაამარცხებს, ხოლო „რაპიდი“ ლასკ-თან ქულებს დაკარგავს, გრაცელები მე-2 ადგილთან ერთად, ჩემპიონთა ლიგის საკვალიფიკაციო ეტაპზე თამაშის უფლებას მოიპოვებენ.