გერმანიის გამარჯვებათა სერია ჩრდილოეთ მაკედონიამ შეწყვიტა

0
3

გერმანიის ეროვნული გუნდი მსოფლიო 2022 წლის ჩემპიონატის შესარჩევი ციკლის J ჯგუფში შინ ჩრდილოეთ მაკედონიასთან 1:2 დამარცხდა.

პირველი ტაიმისთვის დამატებულ მე-2 წუთზე ანგარიში გორან პანდევმა გახსნა. 63-ე წუთზე გიუნდოგანმა პენალტის ნიშნულიდან საპასუხო გოლი გაიტანა. 85-ე წუთზე მაკედონიელებს გამარჯვება ელმასმა მოუტანა.

გერმანიის ნაკრები არსებობის ისტორიაში მსოფლიო ჩემპიონატების საკვალიფიკაციო ეტაპზე მესამედ დამარცხდა. გერმანელებმა პირველი თამაში 1985 წელს პორტუგალიასთან 0:1 წააგეს, ხოლო 2001 წელს ინგლისთან – 1:5.

2001 წლის შემდეგ ბუნდესნაკრებმა მუნდიალების შესარჩევებში პირველი თამაში წააგო.

გარდა ამისა, მსოფლიო პირველობების შესარჩევებში გერმანელთა 18-მატჩიანი გამარჯვებათა სერია შეწყდა. ამასთანავე, წაუგებელ მატჩთა სერია 35-ს შეადგენდა – 30 გამარჯვება და 5 ფრე.