ოთარ გიორგაძე: “რეაბილიტაცია კარგად მიდის”

0
6

ბორჯღალოსანთა მესამეხაზელი ოთარ გიორგაძე მუხლზე გაკეთებული ოპერაციის შემდეგ რეაბილიტაციას გადის.

25 წლის მორაგბემ დაზიანება 3 იანვარს, ‘სტად ფრანსესთან’ მატჩში მიიღო. იყო შანსი, რომ გიორგაძეს მკურნალობის და სპეციალური პროცედურების შემდეგ, თამაში მალევე გაეგრძელებინა, მაგრამ ასეთ შემთხვევაში, ის მუდმივი საფრთხის ქვეშ იქნებოდა და ამიტომ, ოპერაციის გაკეთება გადაწყვიტა:

„დაზიანება სრულიად უწყინარ სიტუაციაში, კონტაქტამდე მივიღე და თამაში ვეღარ გავაგრძელე. ოპერაციამდე ფეხის მდგომარეობა უმჯობესდებოდა და ტკივილებმაც გამიარა. გაჩნდა ვარაუდი, მუხლი გამემაგრებინა და თამაში ისე გამაგრძელებინა, მაგრამ უკანა ჯვარედინი მყესი დაზიანებული მქონდა და გაწყვეტის დიდი რისკი იყო. ამიტომ, ბევრი ფიქრის შემდეგ ოპერაციის გაკეთება გადავწყვიტე და სწორად მოვიქეცი“.

„ოპერაცია 23 იანვარს, კლერმონში უძლიერეს მუხლის სპეციალისტთან და ქირურგთან გავიკეთე. მეორე დღესვე გამომწერეს და კლუბის ექიმების მეთვალყურებით, კუნთის „გაღვიძების“ მიზნით ელემენტარული ვარჯიშები დავიწყე. რეაბილიტაცია კარგად მიდის და პროტოკოლს ვუსწრებ კიდეც, თუმცა გართულებების თავიდან აცილების მიზნით, ფეხს ზედმეტად არ ვტვირთავ. უკვე გადასული ვარ ველოსიპედზე და სავარაუდოდ აგვისტო-სექტემბერში დავბრუნდები. წინ კიდევ ხანგრძლივი სარეაბილიტაციო პერიოდი მაქვს და იმედია ყველაფერი კარგად გაგრძელდება“ – ამბობს ოთია.

რადგან მორაგბე მუხლმა იძულებით შეაჩერა, მორაგბემ სხვა პრობლემების მოგვარებისთვისაც მოიცალა, რაც დიდი ხანია აწუხებს:

„ამ პერიოდში აუცილებლად უნდა აღმოვფხვრა წელის პრობლემა, რაც დიდი ხანია მაწუხებს. მიმდინარე სეზონისთვის მზადება დავიწყე თუ არა, წელის ძლიერი ტკივილები დამეწყო. ახლა მინდა ეს პერიოდი გამოვიყენო, ეს პრობლემა მოვაგვარო და ახალ სეზონში ახალი ძალით და ენერგიით დავბრუნდე“.

ოთარ გიორგაძის ანგარიშზე 29 სანაკრებო კეპია (6 ლელო). ბოლოს მან ბორჯღალოსნების რიგებში „შემოდგომის ერთა თასზე“ ითამაშა. ის თვლის, რომ მეტი ზრდისთვის ბევრი ასეთი თამაშის ჩატარებაა საჭირო:

„როგორც გუნდი, გავიზარდეთ. „შემოდგომის ერთა თასმა“ ინდივიდუალურად და გუნდურად ბევრი რამ შემატა. ჰაერივით გვჭირდება ასეთი დონის თამაშები, რათა ჩვენი თავი ვიპოვნოთ და დავიმკვიდროთ ადგილი ამ დიდ არენაზე. ცუდი ისაა, რომ ამის შემდეგ კვლავ რაგბი ევროპის ჩემპიონატზე გვიწევს დაბრუნება…“.

წლევანდელ რაგბი ევროპის ჩემპიონატზე, რომელიც ასევე 2023 წლის მსოფლიო თასის შესარჩევი ეტაპიცაა, გიორგაძე ბორჯღალოსნებს ტრავმის გამო ვერ ეხმარება, თუმცა თამაშებს თვალს ადევნებს და გუნდის შენების პროცესით კმაყოფილია. ის იმედოვნებს, რომ მსოფლიო თასს საქართველო მომზადებული შეხვდება:

„რუსეთთან თამაში ყოველთვის დიდი წნეხია, რადგან ვიცით, მათთან წაგება არ შეიძლება! მიუხედავად იმისა, რომ თებერვალში მცირე სხვაობა დაფიქსირდა, არც მე და არც სხვა მოთამაშეებს არ გვქონდა განცდა, რომ შეიძლებოდა ვერ მოგვეგო. პორტუგალიასთანაც გვქონდა ხარვეზები, მაგრამ მთლიანობაში ცუდად არ გვითამაშია. ფაქტობრივად ახალი გუნდის შენების პროცესში ვართ და ჩემი აზრით, ეს პროცესი კარგად მიდის, ხარვეზები კი აუცილებლად გამოსწორდება“.

„დარწმუნებული ვარ მსოფლიო თასის შესარჩევ ციკლს წარმატებით გავივლით და იქ იმ გუნდებთან მოგვიწევს შეხვედრა, რომლებთან თამაშის გამოცდილებაც უკვე გვაქვს. ყველა ცდილობს, რომ მსოფლიო თასს ფორმის პიკში შეხვდეს, ასე ვართ ჩვენც და თუ ყველანი ერთი მიზნისკენ ვივლით, შედეგიც აუცილებლად მოვა“.