შემოდგომის ერთა თასი – მეტოქეების შესახებ

0
4

მას შემდეგ, ბორჯღალოსნებმა პირველი ტესტ-მატჩი (საერთაშორისო მატჩი) გამართეს (1989 წლის 12 სექტემბერი, ზიმბაბვეს წინააღმდეგ ქუთაისში), 31 წელი გავიდა და წელს შემოდგომაზე, მსოფლიო თასს მიღმა, საქართველოს ნაკრები ტიერ1-ის (პირველი ეშელონის ნაკრები) ქვეყნებთან პირველად გამართავს მიჯრით ხუთ თამაშს.

რომ დავკონკრეტდეთ, მსოფლიო თასზე მონაწილეობისას, ჯგუფურ ეტაპზე ორი, ან სამი თამაშის ჩატარება გვიწევდა ტიერ1-ის გუნდებთან. ამ კუთხით გამორჩეული იყო 2019 წელი, როდესაც მოსამზადებელ ეტაპზე შოტლანდიას ორჯერ ვეთამაშეთ (მოსამზადებელ ეტაპზე პირველად ვეთამაშეთ ტიერ1-ის გუნდს), ხოლო იაპონიაში უელსს და ავსტრალიას, ასევე ფიჯის ნაკრებს შვხვდით, რომელიც ოფიციალური სტატუსით არა, მაგრამ ხარისხით ტიერ1-ის გუნდებს არაფრით ჩამოუვარდებოდა.

წელს ზაფხულში ბორჯღალოსნებს სამხრეთ აფრიკაში ტურნე ჰქონდათ დაგეგმილი, სადაც მსოფლიოს მოქმედ ჩემპიონ „სპრინგბოკსს“ უნდა შეხვედროდნენ, მაგრამ COVID-19-ის პანდემიამ ზაფხულის ტესტები მხოლოდ საქართველოსთვის კი არა, მთელი მსოფლიოსთვის ჩაშალა.

გამოსავლის ძიებაში, მსოფლიო რაგბმა და ექვსმა ერმა ნოემბერ-დეკემბერში ერთჯერადი ტურნირი, „შემოდგომის ერთა თასი“ დაგეგმა (რომელიც 8 ერის სახელითაცაა ცნობილი), სადაც ექვსი ერის გუნდებთან ერთად, ორი წვეული გუნდი ითამაშებს და ფიჯისთან ერთად, საოცნებო, მაღალი დონის თამაშები საქართველოს ნაკრებსაც ექნება.

8 ერამდე ორი მატჩი

შემოდგომის ერთა თასამდე ბორჯღალოსნებს გასახურებლად ორი თამაში აქვთ და ჯამში, ოქტომბრის ბოლოდან დეკემბრის დასაწყისამდე, ექვს შეხვედრას გამართავენ, აქედან ოთხს, გარანტირებულად ტიერ1-ის გუნდთან.

საქართველოს ნაკრების საშემოდგომო ვოიაჟი 23 ოქტომბერს, ედინბურგში, „მარიფილდზე“ შოტლანდიის ნაკრებთან მატჩით იწყება. აქამდე სქოთებთან ოთხჯერ გვითამაშია – ერთხელ მსოფლიო თასზე, ორჯერ სტუმრად და ერთხელ თბილისში. ყველა ჯერზე გამარჯვება მეტოქეს დარჩა.

შოტლანდიასთან ტესტ-მატჩიდან დაახლოებით ერთ კვირაში, 1 ნოემბერს თბილისში რუსეთის ნაკრებს ვუმასპინძლებთ. ესაა 2020 წლის რაგბი ევროპის ჩემპიონატის გადადებული შეხვედრა, რომელიც მარტში უნდა გამართულიყო და პანდემიის გამო გადაიდო. მატჩი უმაყურებლებოდ ჩაივლის.

რაგბის სამშობლოში ექვსი ერის რეკორდსმენთან

რუსეთთან შეხვედრის შემდეგ, ბორჯღალოსნები უშუალოდ „შემოდგომის ერთა თასისთვის“ იწყებენ მზადებას და პირველ მატჩს „თვიქენემზე“, ინგლისის წინააღმდეგ გამართავენ. ესაა პირველი შემთხვევა, როდესაც „რაგბის სამშობლოს” ნაკრებს მსოფლიო თასს მიღმა ვეთამაშებით.

ინგლისის ნაკრები პირველად 1871 წელს შეიკრიბა და რაგბში პირველი საერთაშორისო შეხვედრა (ტესტ-მატჩ) შოტლანდიასთან გამართა. 149 წლის განმავლობაში, „ვარდებს“ 746 ტესტი აქვთ ჩატარებული, საიდანაც მოიგეს 414, დათმეს 281 და ფრედ დაასრულეს 51. მათ ყველაზე დიდი სხვაობით 2001 წელს, რუმინეთის ნაკრები დაამარცხეს (134:0).

ბუნებრივია, ინგლისის ნაკრები ცხრავე მსოფლიო თასის მონაწილეა და ერთხელ, 2003 წელს მსოფლიოს ჩემპიონიც გახდა, სამჯერ კი ფინალში დამარცხდა და ვერცხლის მედლებს დაეუფლა, მათ შორის 2019 წელს იაპონიაში. აღსანიშნავია, რომ ინგლისი ერთადერთი ევროპული ნაკრებია, რომელმაც მსოფლიო თასი მოიგო.

ინგლისმა 122-ჯერ ითამაშა ექვს ერსა და მის წინამორბედ ტურნირებში და ერთპიროვნულად ყველაზე მეტჯერ, 28-ჯერ გახდა გამარჯვებული, ხოლო კიდევ 10-ჯერ ტიტული სხვა გუნდთან გაინაწილა და საერთო მაჩვენებლით მეორე ადგილზეა.

არაა გამორიცხული, რომ 14 ნოემბერს ინგლისს ექვსი ერის მოქმედი გამარჯვებულის სტატუსით ვეთამაშოთ, რადგან ისინი 4 ტურის შემდეგ 13 ქულით პირველ ადგილზე არიან და ბოლო, გადადებულ შეხვედრას 31 ოქტომბერს, აუტსაიდერ იტალიასთან გამართავენ. მისი კონკურენტები არიან საფრანგეთი და ირლანდია. ამ უკანასკნელს მეტოქეზე ერთით ნაკლები შეხვედრა აქვს ჩატარებული, 24 ოქტომბერს იტალიას მასპინძლობს და ბონუსით მოგების შემთხვევაში პირველ ადგილზე აღზევდება, 31 ოქტომბერს კი საფრანგეთს სტუმრად ეთამაშება.

ბორჯღალოსნებს ინგლისის ნაკრებთან ორჯერ უთამაშიათ. პირველი კვეთა 2003 წლის მსოფლიო თასზე მოხდა და მომავალმა ჩემპიონმა, ლეგენდარული ჯონი უილკინსონის გუნდმა 84:6 იმარჯვა. ეს იყო ჩვენი გუნდის პირველი მატჩი მსოფლიო თასზე.

მეორედ ინგლისს 2011 წელს, ახალ ზელანდიაში შევხვდით. ჩვენმა გუნდმა მეტოქეს დიდი წინააღმდეგობა გაუწია და საათის თავზე სხვაობა მხოლოდ 8 ქულა იყო, საბოლოოდ კი ინგლისმა 41:10 მოიგო.

საგულისხმოა, რომ ინგლისელთა თავკაცის, ავსტრალიელი ედი ჯოუნსის ინიციატივით, 2018 და 2019 წლებში ბორჯღალოსნები ორჯერ იყვნენ ჩასული ბრიტანეთში და „ვარდებთან“ 3-3-დღიანი ერთობლივი წვრთნები გამართეს.

უელსი – ექვსი ერის კიდევ ერთი რეკორდსმენი

შემოდგომის ერთა თასის მეორე ტურში, ბორჯღალოსნები 21 ნოემბერს ექვსი ერის კიდევ ერთ რეკორდსმენს, უელსს ეთამაშებიან.

უელსელებმა ნაკრები პირველად 1881 წელს შეკრიბეს და სადებიუტო ტესტ-მატჩი ინგლისის ნაკრებთან გამართეს. სულ მათ ანგარიშზე 737 თამაშია, საიდანაც მოიგეს 386, ფრედ დაასრულეს 29 და დამარცხდნენ 322 შემთხვევაში. ყველაზე დიდი სხვაობით „დრაკონებს“ იაპონიის ნაკრები ყავთ დამარცხებული, 2004 წელს 98:0.

მსოფლიო თასზე უელსმა საუკეთესო შედეგი პირველ ტურნირში, 1987 წელს აჩვენა, როდესაც ბრინჯაოს მედლები მოიპოვა. „დრაკონები“ კიდევ ორჯერ იყვნენ ნახევარფინალში და მეოთხე ადგილი დაიკავეს – 2011 და 2019 წლებში.

უელსის ნაკრებს ირლანდიასა და შოტლანდიასთან ერთად, ექვს ერსა და მის წინამორბედ ტურნირებში ყველაზე მეტჯერ, 124-ჯერ უთამაშია და ერთპიროვნულად, ინგლისის შემდეგ ყველაზე მეტჯერ, 27-ჯერ იყო ჩემპიონი, 12-ჯერ ტუტული სხვა მეტოქესთან გაიყო და ჯამში ექვსი ერის გამარჯვებული ყველაზე მეტჯერ, 39-ჯერ (ინგლისზე ერთით მეტჯერ) გახდა.

2020 წლის ექვს ერზე, „დრაკონებმა“ მხოლოდ იტალიის დამარცხება შეძლეს, წააგეს ირლანდიასთან, საფრანგეთთან და ინგლისთან, ტურნირს კი 31 ოქტომბერს, შოტლანდიასთან მატჩით ასრულებენ.

ბორჯღალოსნებს უელსის წინააღმდეგ ორჯერ უთამაშიათ. 2017 წლის ნოემბრის ტესტ-მატჩში, საქართველო მეტოქეს „მილენიუმზე“ ეწვია და დადებით (ფრესთან) შედეგთან ახლოს იყო, თუმცა მასპინძლებმა შეხვედრის მიწურულს შერკინებაში მიწოლის გაუქმებას მიაღწიეს და 13:6 მოიგეს. აღსანიშნავია, რომ ამ თამაშს და განსაკუთრებით დასკვნით წუთებში განვითარებულ მოვლენებს, სარაგბო სამყაროში დიდი გამოხმაურება მოყვა.

2019 წელს უელსს უკვე იაპონიაში, მსოფლიო თასზე ვეთამაშეთ და ბრიტანელებმა 43:14 იმარჯვეს.

მეხუთედ ირლანდიასთან

„შემოდგომის ერთა თასის“ ჯგუფური ეტაპის დასკვნით მატჩს ბორჯღალოსნები 29 ნოემბერს, „ავივაზე“ ირლანდიის წინააღმდეგ გამართავენ.

ირლანდიის ნაკრებს 145-წლიანი ისტორია აქვს. მათ პირველი მატჩი 1875 წელს ინგლისთან გამართეს, მას შემდეგ კი, 706 მატჩიდან 320 მოიგეს, 32 ფრედ დაასრულეს და 354 შეხვედრა დათმეს. მათ ყველაზე დიდი სხვაობით 2000 წელს, აშშ დაამარცხეს – 83:3.

„სამყურებს“ ყველა მსოფლიო თასზე აქვთ ნათამაშები, თუმცა მეოთხედფინალზე შორს აქამდე არასდროს წასულან. ეს 7-ჯერ მოხდა, ორჯერ კი (1999 და 2007 წლებში) ისინი რვა საუკეთესო გუნდს მიღმა დარჩნენ.

ირლანდიამ ექვსი ერისა და მისი წინამორბედი 124 ტურნირიდან 14 ერთპიროვნულად მოიგო, 9-ჯერ კი ტიტული მეტოქეებთან გაიყო. ბოლოს ისინი გამარჯვებულები 2018 წელს გახდნენ და წელსაც შეუძლიათ წარმატების მიღწევა.

ისინი 9 ქულით მეოთხე ადგილზე არიან, თუმცა სხვა ნაკრებებთან შედარებით, ერთით ნაკლები მატჩი აქვთ ჩატარებული. 24 ოქტომბერს ირლანდია იტალიას მასპინძლობს და ბონუსით გამარჯვების შემთხვევაში, პირველ ადგილზე აღზევდებიან, დასკვნით ტურში კი საფრანგეთს (31 ოქტომბერი) ეთამაშებიან.

ბორჯღალოსნებს ირლანდიელებთან 4-ჯერ უთამაშიათ. 1998 და 2002 წლებში, მეტოქემ მსოფლიო თასის შესარჩევ მატჩებში იმარჯვა, შესაბამისად 70:0 და 63:14. 2007 წლის მსოფლიო თასზე, საქართველოსა და ირლანდიის ნაკრებებს შორის შედგა მატჩი, რის შემდეგაც ბორჯღალოსნების ძალაზე მთელი მსოფლიო ალაპარაკდა. ქართველებმა დასკვნითი 20 წუთი მეტოქის 22-ში გაატარეს, თუმცა გამარჯვების ლელოს გატანა ვერ შეძლეს და ირლანდიამ 14:10 იმარჯვა. 2014 წელს მათ ტესტ-მატჩში, „ავივაზე“ შევხვდით და გამარჯვება ამჯერადაც მასპინძლების მხარეს იყო – 49:7.

ვინ იქნება მეოთხე

ვინ იქნება ბორჯღალოსნების მეოთხე მეტოქე ტურნირის ჯგუფური ეტაპის დასრულების შემდეგ, 29 ნოემბერს გაირკვევა.

ფორმატის თანახმად, 6 დეკემბერს „ა“ ჯგუფის გამარჯვებული „ბ“ ჯგუფის გამარჯვებულს ფინალში შეხვდება, ერთი დღით ადრე კი, ჯგუფის მეორეადგილოსნები ტურნირზე მესამე ადგილისთვის იბრძოლებენ, მესამეები მეხუთესთვის და მეოთხეები მეშვიდესთვის.

„ბ“ ჯგუფში საფრანგეთის, შოტლანდიის, იტალიისა და ფიჯის ნაკრებები თამაშობენ.

შემოდგომის ერთა თასი 2020

ა ჯგუფი

ინგლისი

უელსი

ირლანდია

საქართველო

 

ბ ჯგუფი

საფრანგეთი

შოტლანდია

იტალია

ფიჯი

 

I რაუნდი

13 ნოემბერი: ირლანდია – უელსი (ავივა სთედიუმი, 23:00 საქ. დრო)

14 ნოემბერი: იტალია – შოტლანდია (???, 16:45)

14 ნოემბერი: ინგლისი – საქართველო (თვიქენემი, 19:00)

15 ნოემბერი: საფრანგეთი – ფიჯი (???, ??:??)

 

II რაუნდი

21 ნოემბერი: იტალია – ფიჯი (???, 16:45)

21 ნოემბერი: ინგლისი – ირლანდია (თვიქენჰემი, 19:00)

21 ნოემბერი: უელსი – საქართველო (???, 21:15)

22 ნოემბერი: შოტლანდია – საფრანგეთი (მარიფილდი, 19:00)

 

III რაუნდი

28 ნოემბერი: შოტლანდია – ფიჯი (მარიფილდი, 17:45)

28 ნოემბერი: უელსი – ინგლისი (???, 20:00)

28 ნოემბერი: საფრანგეთი – იტალია (სტად დე ფრანსე, 24:00)

29 ნოემბერი: ირლანდია – საქართველო (ავივა სთედიუმი, 18:00)

ფინალური კვირა

5 დეკემბერი: ა4 – ბ4 (მარიფილდი, 16:00)

5 დეკემბერი: ა3 – ბ3 (ავივა სთედიუმი, 18:15)

5 დეკემბერი: ა2 – ბ2 (???, 20:15)

6 დეკემბერი: ა1 – ბ1 (თვიქენჰემი, 18:00)