გიორგი ქართველიშვილი: “დღევანდელი სიტუაციით, ევრობასკეტი 2021 დათქმულ ვადებში გაიმართება”

0
7

საერთაშორისო ოლიმპიურმა კომიტეტმა უპრეცედენტო გადაწყვეტილება მიიღო – 2020 წლის ტოკიოს ოლიმპიური თამაშები 2021 წელს გადადო. ამ ცვლილებას 2021 წლის სპორტულ კალენდარში სერიოზული ცვლილებები შეიძლება მოჰყვეს.

ბერძნული საიტები უკვე ალაპარაკდნენ ევრობასკეტი 2021-ის გადატანაზე. ცხადია, დღეს მხოლოდ ჟურნალისტური ვარაუდის გამოთქმა შეიძლება, თუმცა ვინაიდან ევროპის 2021 წლის საკალათბურთო პირველობა (ერთი ჯგუფის მატჩები) საქართველოში იმართება, ჩვენთვის მეტად ახლო და მტკივნეული თემაა.

სიტუაციაში გასარკვევად კალათბურთის ფედერაციის გენერალურ მდივან გიორგი ქართველიშვილს დავუკავშირდით, რომელიც ფიბა-ს ბორდის წევრია:

– საერთაშორისო სპორტული ღონიძიებების მწვერვალი ოლიმპიური თამაშებია. შესაბამისად, მას უნდა მოერგოს ბევრი სხვა შეჯიბრება. 24 მარტს ოფიციალურად გადაწყდა ტოკიოს ოლიმპიადის 2021 წელს გადატანა, თუმცა ზუსტი ვადა არ დადგენილა. ითქვა, რომ თამაშები გაიმართება არაუგვიანეს აგვისტოსი. ევრობასკეტი კი, 2021 წლის სექტემბერში უნდა გაიმართოს. დღეს არავინ იცის, ოლიმპიადა კონკრეტულად რომელ თვეში ჩატარდება. შესაბამისად, სექტემბერში ევროპის ჩემპიონატის გამართვა-არგამართვის საკითხი დღის წესრიგში ვერ დადგებოდა. ეს, რა თქმა უნდა, კალათბურთის საერთაშორისო ორგანიზაციაში განხილვის თემა იქნება, მაგრამ მას მერე, რაც ოლიმპიადის ვადები გვეცოდინება, – გვითხრა ბატონმა გიორგიმ.

მკითხველისთვის საინტერესო უნდა იყოს ისიც, როდისაა ჩანიშნული ფიბაში მსჯელობა ევრობასკეტის შესახებ.

– ჩვენ ვლაპარაკობთ შეჯიბრებაზე, რომელიც წელიწადნახევრის შემდეგ უნდა გაიმართოს. შესაბამისად, ფიბაშიც არავინ ჩქარობს. მუდმივი კონტაქტი მაქვს ფიბა-ევროპის პრეზიდენტ თურგაი დემირელთან, ბორდის წევრებთან… რადგან დრო საკმარისად გვაქვს, ველოდებით მოვლენების განვითარებას. მხოლოდ საქართველო როდია ევრობასკეტის მასპინძელი, საინტერესოა გერმანიის, იტალიისა და ჩეხეთის მოსაზრებაც. კარგად მოგვეხსენება, რა მდგომარეობაა ევროპაში კორონავირუსთან დაკავშირებით, თუმცა რომელ ქვეყანაში როგორ შეიცვლება სიტუაცია, არავინ იცის. სხვათა შორის, ყველა აღიარებს საქართველოს სწორ მიდგომას კორონავირუსის პრევენციასა და მკურნალობასთან დაკავშირებით. ეს საუბრისას ფიბას ხელმძღვანელობამაც დააფიქსირა.

კიდევ ერთი თემა, რომლითაც გიორგი ქართველიშვილთან საუბრისას დავინტერესდით ევრობასკეტი 2021-ისთვის მშენებარე საკალათბურთო დარბაზია…

– საქართველოს მთავრობამ გამოაცხადა – საგანგებო მდგომარეობისას სტრატეგიული ობიექტების მშენებლობა არ შეფერხდებაო. სწორედ ასეთი ობიექტია საკალათბურთო არენა, რომლის მიდამოებში სპეციალური სამედიცინო პუნქტი მოეწყო და იქ დასაქმებულ თითოეულ ადამიანს მუდმივად ამოწმებენ. ასე რომ, დარბაზის მშენებლობა იმავე ტემპში მიმდინარეობს, როგორშიც დაგეგმილი იყო. …და განვმეორდები – ევრობასკეტის გადადებაზე, სადღეისოდ ლაპარაკი არ არის.