საქართველოს ნაკრები სერბეთში ერთი ცვლილებით ჩავიდა

0
7

საქართველოს კალათბურთელთა ეროვნული ნაკრები სერბეთშია. საქართველოს ნაკრები სასტუმრო Crowne Plaza-ში დაბინავდა, სადაც ასევე სერბეთის ნაკრებია დაბანაკებული.

ბელგრადში და მის გზად ილიას ზუროსმა არაერთი სახელიანი ნაცნობი ნახა: მოსკოვის ცსკა-ს ბერძენი მთავარი მწვრთნელი – დიმიტრის იტუდისი და მოთამაშე კოსტას კუფოსი ჩვენს მწვრთნელს სასტუმროში შეხვდნენ მეგობრულად მოიკითხეს. საქართველოს ნაკრების მწვრთნელს გულთბილად შეხვდა ასევე ლეგენდარული სერბი მწვრთნელი ჟელკო ობრადოვიჩი, რომელმაც ბელგრადამდე საქართველოს ნაკრებთან ერთად იმგზავრა და  რეისის მომლოდინემ ზუროსთან ხანგრძლივად ისაუბრა.

საქართველოს დღეს ვარჯიში აქვს დაგეგმილი, რომელიც ალეკსანდარ ნიკოლიჩის სახელობის დარბაზში საღამოს 6 საათზე (თბილისის დროით 21:00) გაიმართება. ღამით ნამგზავრ კალათბურთელებს მხოლოდ მსუბუქი დატვირთვა და ენერგიის აღმდგენი ვარჯიშები ელით.

საქართველოს ნაკრების შემადგენლობაში ცვლილებაა. შვეიცარიასთან 12-კაციან განაცხადში მყოფი ბექა ბექაური ილია ლონდარიძემ ჩაანაცვლა, რომელიც ბელგრადშია და სერბეთთან მატჩისთვის ემზადება. შეგახსენებთ, რომ საქართველოს ნაკრები 23 თებერვალს ევროპისა და მსოფლიო ერთ-ერთ საუკეთესო ნაკრებს ეთამაშება, რომელმაც ევროპის 2021 წლის ჩემპიონატის საკვალიფიკაციო ტურნირი სტუმრად ფინეთის განადგურებით დაიწყო.

სერბეთი საქართველოს ალეკსანდარ ნიკოლიჩის (პარტიზანის) დარბაზში უმასპინძლებს. შეხვედრა 23 თებერვალს, თბილისის დროით 20:00 საათზე გაიმართება და მის პირდაპირ ტრანსლაციას საქართველოს პირველი არხი განახორციელებს.