რაგბი ევროპა – ესპანეთი ლეგიონერებით გაძლიერდა

0
6
9 თებერვალს ბორჯღალოსნები რაგბი ევროპის ჩემპიონატის მეორე მატჩს მადრიდში, უნივერსიტეტის ცენტრალურ სტადიონზე საქართველოს დროით 15:45 საათზე, ესპანელი „ლომების“ წინააღმდეგ გამართავენ.

გასულ შაბათს ბორჯღალოსნებმა რუმინელებს 6 ლელო დაუდეს და 41:13 დაამარცხეს. ამავე დღეს ესპანეთი სტუმრად რუსეთის ნაკრებს ეთამაშა, სოჭში ორის წილ 5 ლელო გაუტანა და 31:12 სძლია. შედეგად, პირველ ტურში ორივე გუნდმა აიღო ბონუს-ქულა და 5-5 ქულით პირველ-მეორე ადგილებს იყოფენ.

ესპანელები ფიქრობენ, რომ შარშანდელის შემდეგ, გუნდი მნიშვნელოვნადაა გაზრდილი და წელს პირველად, რაგბი ევროპის ჩემპიონატის მოგება შეუძლიათ, ამისათვის კი 9-ში ბორჯღალოსნებს უნდა სძლიონ.

„ლომების“ მთავარმა მწვრთნელმა სანტიაგო სანტოსმა, ამ მიზნის მისაღწევად შემადგენლობის გაძლიერება გადაწყვიტა და ბაზაზე 5 ლეგიონერს უხმო. ესენი არიან ‘ბეზიეს’ 32 წლის კვაჭი მარკო პინტო, ‘პოს’ ფულბეკი შარლი მალი, ინგლისის ქვედალიგელი, ‘ბლექჰართის’ მეორეხაზელი ჯოშუა პიტერსი, ‘ბიარიცის’ მესამეხაზელი ასიერ უსარაგა და ‘ლა როშელის’ ესპუართა გუნდის უკანახაზელი მარტინ ალონსო, რომელსაც ნაკრების კვართით ჯერ არ უთამაშია.

დადებითი ბალანსი უხერხულ მეტოქესთან

ბორჯღალოსნებისა და „ლომების“ გზები პირველად 21-ე საუკუნის დასაწყისში გადაიკვეთა და ის თავიდანვე იქცა ჩვენთვის უხერხულ მეტოქედ, თუმცა ურთიერთშეხვედრებში საქართველო მაინც რჩება უპირობო დომინანტად. დღემდე გუნდები ერთმანეთს 20-ჯერ ეთამაშნენ და აქედან 16 მატჩში გამარჯვება ჩვენს გუნდს დარჩა, 3-ჯერ მეტოქემ იმარჯვა, ხოლო ერთხელ ფრე დაფიქსირდა.

„ლომებმა“ სამივე თამაში მადრიდში მოიგეს – 2000 წელს, პირველ შეხვედრაში 36:32, 2007 წელს 31:17 და 2012 წელს 25:18. ფრე ასევე ესპანეთში, ტარაგონაში დაფიქსირდა – 6:6. ეს იყო ერთადერთი შემთხვევა, როდესაც ბორჯღალოსნებმა ესპანეთს ლელო ვერ დაუდეს.

ბორჯღალოსნებმა ესპანეთი ყველაზე დიდი სხვაობით 2011 წელს დაამარცხეს, როდესაც „მიხეილ მესხზე“ 9 უპასუხო ლელო გაუტანეს – 60:0. 2013 წელს „ლომებს“ ასევე „მიხეილ მესხზე“ 8 ლელო გავუტანეთ და 61:18 ვძლიეთ, სტუმრად კი ყველაზე დიდი სხვაობა 2009 წელს დაფიქსირდა – 8 ლელო და 55:11 მადრიდში. ესპანეთთან ერთ-ერთი ყველაზე დასამახსოვრებელი მატჩი 2008 წელს „დინამოზე“ გვქონდა, როდესაც 0:17-ის შემდეგ, მეტოქეს 22:20 ვძლიეთ.

„ლომებს“ მადრიდში ბოლოს 2015 წელს შევხვდით და 26:13 ვძლიეთ. 2017 წელს გასვლითი შეხვედრა ვალიადოლიდში გვქონდა და ბორჯღალოსნებმა 20:10 იმარჯვეს, შარშან და შარშანწინ კი მას თბილისში 23:10 და 24:10 მოვუგეთ. 2012 წლის შემდეგ, საქართველოს ნაკრებს ესპანეთთან 8-მატჩიანი გამარჯვებების სერია აქვს, განვლილ 20 მატჩში კი ქულათა ბალანსი 614-290-ზეა, ხოლო ლელოების 84-31-ზე.