ბითაძის 15 ქულა და გამარჯვება “ზადართან”

0
22

ტრავმის მორჩენის შემდეგ გოგა ბითძე ფორმაში შევიდა და მორიგი შედეგიანი მატჩი ჩაატარა. მისმა “ბუდუჩნოსტმა” ადრიატიკის ლიგაში ხორვატულ “ზადარს” უმასპინძლა და 75:69 დაამარცხა, ქართველი ლეგიონერი კი ერთ-ერთი საუკეთესო იყო.

19 წლის ქართველმა ცენტრმა მოედანზე 24:32 წუთი გაატარა და პოდგორიცელებს 15 ქულა, 3 მოხსნა, თითო პასი-ჩაჭრა შესძინა. გოგამ 5-დან 4 ორქულიანი და 10-დან 7 საჯარიმო ჩააგდო, სამქულიანი ააცილა, ბურთი 3-ჯერ დაკარგა, ამდენივე პერსონალური ფოლი მიიღო, მის წინააღმდეგ კი 6-ჯერ დაჯარიმდნენ. გამარჯვებულთაგან ბითაძეზე მეტი – 18 ქულა ერლ კლარკმა მოაგროვა, ხოლო ნემანია გორდიჩს 9 ქულა და 10 პასი ჰქონდა.

“ბუდუჩნოსტმა” 14 მოგება და 6 მარცხი მოაგროვა და რეგულარულ სეზონში ორი მატჩიღა დარჩა ჩასატარებელი: 11 მარტს, სერბეთში, ბითაძის ყოფილ კლუბ “მეგა ბემაქსთან” და 17 მარტს, შინ, ხორვატულ “ციბონასთან”.