გიორგი ლორია “მაგდებურგში” ჩაირიცხა

0
40

გერმანულ საფეხბურთო კლუბ ”მაგდებურგში” გამოცდილი ქართველი მეკარე გიორგი ლორია ჩაირიცხა. საქართველოს ეროვნული ნაკრების წევრი გერმანული კლუბის ღირსებას სეზონის ბოლომდე დაიცავს.

32 წლის ფეხბურთელის ახალი კლუბი მეორე ბუნდესლიგაში გასულ სეზონში აღზევდა, მიმდინარე სეზონში კი აუტსაიდერია, გერმანიის რანგით მეორე ლიგაში ადგილის შენარჩუნებისთვის იბრძვის. ცხრილში არსებული სიმჭიდროვიდან გამომდინარე ლორიას გუნდს ლიგაში ადგილის შენარჩუნების რეალური შანსი აქვს.

უგუნდოდ მყოფმა ლორიამ ერთა ლიგის ჯგუფური ეტაპის ექვსივე მატჩში მიიღო მონაწილეობა და მხოლოდ 2 გოლი გაუშვა. გასული წლის სექტემბერში რუსული კლუბის დატოვების შემდეგ ლორია ფორმის შენარჩუნების მიზნით ყოფილ კლუბ თბილისის ”დინამოში” ვარჯიშობდა.

2015 წელს გიორგი ლორიამ პირეოსის ”ოლიმპიაკოსი” დატოვა და ”კრილია სოვეტოვის” ფეხბურთელი გახდა.  2017-18 წლების სეზონი განათხოვრებით ”ანჟიში” გაატარა, შემდეგ კი სამარულ კლუბს დაუბრუნდა.

საერთო ჯამში ლორიამ რუსეთის პრემიერლიგაში 52 მატჩი ჩაატარა. რუსული გამოცემების ვერსიით არაერთხელ ტურის სიმბოლურ გუნდში მოხვდა. რუსული კლუბების გარდა ლორიას თბილისის ”დინამოსა” და ბერძნული ოფი-ს შემადგენლობაში უთამაშია.

შეხსენებისთვის, 1974 წელს “მაგდებურგს” თასების თასი მოუგია. გერმანელებმა როტერდამში ჩატარებულ ფინალში “მილანს” 2:0 მოუგეს…