ფრანგული Rugbyrama.fr: “გურამ გოგიჩაშვილს შეუძლია გახდეს მსოფლიოს საუკეთესო ბურჯი”

0
5
ახალგზარდა ბორჯღალოსან გურამ გოგიჩაშვილს, რომელიც პარიზულ “რასინგ 92″-ს ზაფხულში, მსოფლიო რაგბის 20-წლამდელთა ჩემპიონატის შემდეგ შეუერთდა, მსოფლიოს საუკეთესო ბურჯობას უწინასწარმეტყველებენ. ფრანგულმა სარაგბო პორტალმა Rugbyrama.fr-მ მას სპეციალური სტატია მიუძღვნა სათაურით – „გურამ გოგიჩაშვილი, მსოფლიოს მომავალი საუკეთესო ბურჯი?”, სადაც 20 წლის მორაგბის მიმართ საქებარ სიტყვებს არ იშურებენ “რასინგის” მწვრთნელი, სპორტული დირექტორი და კაპიტანი.
„გურამ გოგიჩაშვილი რასინგელთა რიგებს მხოლოდ მიმდინარე სეზონის წინ შეუერთდა, თუმცა, მოკლე ხანში გუნდის როტაციაში მყარად ჩაჯდა. ილ-დე-ფრანსის ხელმძღვანელობასა და პერსონალს ეჭვი არ ეპარებათ, რომ ეს ბიჭი თავის პოზიციაზე სიტყვას მსოფლიო დონეზე იტყვის.
რამდენმა ადამიანმა იცოდა გურამის შესახებ ტოპ 14-ს მიმდინარე სეზონის დაწყებამდე? ცხადია, მას იცნობდნენ საქართველოში და თვალყურს ადევნებდნენ ახალგაზრდული ნაკრებების დონეზე. გოგიჩაშვილს ბოდენ ბარეტისა და ჯონ სექსტონის დარი პოპულარობა ჯერ არ მოუპოვებია, მაგრამ რამდენიმე თვეში ადგილი მყარად დაიმკვიდრა ვარსკვლავებით სავსე ტოპ 14-ში (9 მატჩი, აქედან 6 სასტარტოში) და ეს მხოლოდ 20 წლის ასაკში, ბურჯის ურთულეს პოზიციაზე.
“რასინგ 92”-ში ის პირველივე ნახვით შეუყვარდათ: „ეს ის მოთამაშეა, რომელზე აქტიური დაკვირვებაც 20-წლამდელთა მსოფლიო პირველობის დროს დავიწყეთ. გურამთან კონტრაქტი სწორედ ამ ტურნირის მიმდინარეობისას გაფორმდა, ყველაზე დიდი სამუშაო კი მისივე სამშობლოში გავწიეთ, სადაც “რასინგმა” წინასასეზონო შეკრება გაიარა (ზახულისთასი 2018). ამან გოგიჩაშვილზე ძალიან კარგად იმოქმედა. მშობლიურ კედლებში მყოფმა ადაპტაცია სწრაფად გაიარა და გუნდთან მორგება არ გასჭირვებია” – აცხადებს პარიზელთა შერკინების მწვრთნელი ლორენ ტრავერი, რომელმაც გურამი თავიდან ესპუართათვის (დუბლები) შეარჩია, თუმცა ახალ გუნდში მისვლის დღიდან მხოლოდ პირველ გუნდში ვარჯიშობს.
გურამის უსწრაფესი პროგრესი მით უფრო გასაკვირია იმ ფონზე, რომ ის მხოლოდ ქართულ ენაზე საუბრობს. ამჟამად, გურამს კონტაქტი მხოლოდ თანამემამულე ვასილ კაკოვინთან შეუძლია, თუმცა, ეს ხელს არ უშლის თანაგუნდელეთან ერთად ჰარმონიულად იმოქმედოს და მოედანზე ერთ-ერთი შესამჩნევი ფიგურა იყოს, როგორც დაცვაში, ასევე ბურთით ხელში შეტევაში.
“გარდა იმისა, რომ თავის საქმეში, სტატიკაში უძლიერესია, ბურთსაც შესანიშნავად ფლობს. თამაშის წაკითხვა კარგად ეხერხება და ძალიან აქტიურია, განსაკუთრებით დაცვაში თამაშისას” – ამბობს “რასინგის” კაპიტანი დმიტრი შარჟევსკი.
ნოემბერში გოგიჩაშვილმა სამოასთან მოგებულ (27:19) მატჩში პირველად ითამაშა საქართველოს ნაკრების შემადგენლობაში, თანაც იმ პოზიციაზე, რომელზეც ამ ქვეყანაში ყველაზე დიდი კონკურენციაა.
“ვხედავთ, რომ გოგიჩაშვილს მსოფლიო დონეზე უდიდესი პოტენციალი აქვს. როდესაც ვხედავთ რისი კეთება შეუძლია 20 წლის ასაკში… გურამი რომ ახალ ზელანდიელი იყოს, მასზე ალბათ კიდევ უფრო ბევრს ისაუბრებდნენ. გოგიჩაშვილი ძალიან მაგრად ვითარდება და მტკიცედ შემიძლია განვაცხადო: თუკი ის გადაწყვეტს, რომ მსოფლიოს საუკეთესო ბურჯი იყოს, ეს ასეც იქნება” – ამბობს “რასინგის” სპორტული დირექტორი იანიკ ნიანგა.